Lawis mibawos sa Creekside sa SK-FDH caging

CEBU, Philippines - Nakabawos ang Lawis ngadto sa ilang mortal nga kaaway Creekside pinaagi sa pagpilde 98-90 sa Game-2 sa ilang “best of three” finals series sa SK-FDH Hoopfest didto sa Mayors Satellite Gym sa Brgy. Lorega San Miguel.

Human gilubong sa Game-1 sa iskor nga 99-115, ang Lawis nakabangon aron tablahon ang serye, 1-1 ug ilang nasanta ang dautang laraw sa Creekside nga mosilhig sa series.

Si Bryan Ruelan mao na sab ang bida sa kadaugan human mi-iskor og 32 puntos, daku sab og natabang si Jay-R Hassamal, kinsa miposa og nuybe puntos sa final period lakip na ang duha niya ka crucial lay-up.

Sikit kaayo ang kumbati sa duha ka kampo nga miresulta sa panagtabla sa halftime, 49-all. Apan ang Lawis maoy nakakuha sa pabor sa paghuman sa third quarter, 58-53 human sa 3-point play ni Ruelan.

Ang sayong pagka-fouled out ni Jaime Villaceran nakatampo og daku sa problema ni Creekside nga maoy nakapaluya sa duwa sa iyang kaubanan.

Si Villaceran mi-iskor lang og 24 puntos layo ra sa iyang nahimong 69 puntos atol sa Game-1. Si Wilson Ruelan maoy topscorer sa Creekside pinaagi sa iyang 26 puntos. – BANAT NEWS