Korona tuyo sa Ave Maria

CEBU, Philippines - Nag-ung-ong na sa ganghaan sa kalampusan ang Ave Maria Sanctuary Park-USJR Jaguars dihang miugkat kini og 2-0 nga abante human sa ilang 79-68 nga kadaugan batok sa San Marino Corned Tuna-USC Warriors ug nanuktok kini alang sa three-game sweep dihang mag-abot sila pag-usab sa Game-3 sa 4th CESAFI Partner's Cup "best-of-five" championship series karong gabii diha sa Cebu Coliseum.

Sa gihapon, ang Jaguars nagsalig sa kasinatian nilang Manie Gabas, Jabe Delfino ug Kurt Amores aron padayong dominaron ang duwa batok sa Warriors. Sila si Gabas, Delfino ug Amores parehong milawog og 13 puntos alang sa Jaguars.

Ang otso puntos ni Aniceto Lapiz Jr. daku sab og gikatabang, ilabi na dihang mihulga sa pag-rally ang Warriors ug misikit ngadto sa singko puntos, 71-66 sa tunga-tungang bahin sa fourth period.

Kun magpadayon ang ilang kamangtas sa duwa, daw dili na kapugngan ang pagsaulog sa ilang kampiyonato ang Jaguars.

Tuyo sa Jaguars nga molampos sa duha ka butang -una, isip unang team nga modaog og duha ka korona sa Partner’s Cup ug ikaduha, unang team nga mokulit og sweep sukad gipatuman ang best-of-five championship series. 

Aron dili haruson ang Warriors, kinahanglan nga mowadwad og maayo ang ilang star players Giovanni Padillo, Joven Cid Cortes, Edward Bakker, Danilo Belangel, Nilton Otida ug Francis Luigi Bercede. (BANATNEWS)