Holyfield Mi-TKO ni Botha
CEBU, Philippines - Gipahunong ni Evander Holyfield si Frans Botha sa round eight aron pagsakmit sa WBF heavyweight title kagahapon didto sa Thomas and Mack Center sa Las Vegas, Nevada.
Ang 47-anyos nga si Holyfield (43-10), mipatugpa og makusug nga kinumo ngadto sa suwang ni Botha (47-5) kinsa natumba sa naghinapos nga 2:36 sa ikawalong round.
Nakahimo pa pagbarug si Botha bisan paman og giiphan na kini ni referee Russel Mora, apan gitiwasan siya ni Holyfield kinsa daling mipauwan og kinumo ngadto sa South African boxer. Tungod niini si referee Mora napugos paghunong sa away sa 2:05 sa round 8.
Bisan paman sa iyang pangidaron, mipakita gihapon sa iyang kalig-on si Holyfield kinsa nakahimo pa pagdaog bisan paman og mibarag kini sa second round.
Hinuon bisan paman sa iyang kadaugan, gisalikway gihapon sa kanhi five-time world heavyweight champion ang posibilidad sa iyang pagretiro.
Dugang pa ni Holyfield nga gusto pa niya nga sangkaon ang usa sa managsunong Wladimir ug Vitali Klitshcko kinsa mao karon ang duha ka mga hari sa heavyweight division. – BANAT NEWS
- Latest
- Trending
