Celtics mimakmak sa Cavaliers
CEBU, Philippines – Mipakita sa ilang kamangtas ang Boston Celtics diin ilang gipilde ang nanulong nga Cleveland Cavaliers, 117-113 sa nagpadayong National Basketball Association kagahapon didto sa TD Garden sa Boston, Massachusettes.
Si Ray Allen mirehistro og season-high 33 puntos aron pangulohan ang Celtics. Sila si Rajon Rondo ug Kendick Perkins parehong mikulit og double-double. Si Rondo mirehistro og 16 puntos uban ang 14 ka assists, samtang si Perkins miposte og 10 puntos ug 10 sab ka rebounds.
Si Kevin Garnett, kinsa gipamulta og 25 milyones dolyares tungod sa iyang negatibong komento human sa ilang kapildihan batok sa Oklahoma City Thunder niadtong Biyernes, mihakot og 19 puntos ug si Paul Pierce miamot og 16 puntos.
Ang pilderong Cavs gipangulohan ni LeBron James, kinsa mibahog og 42 puntos.
Sa laing duwa, ang San Antonio Spurs milubong sa Los Angeles Lakers, 100-81.
Ang Spurs nga nagbitbit og 47-29 nga baraha gipangulohan ni Manu Ginobili, kinsa miposte og 32 puntos, gisundan ni Tim Duncan nga adunay 24 puntos. Samtang ang Lakers nga adunay 55-22 nga baraha gipangulohan nilang Pau Gasol ug Kobe Bryant nga nagkumboya og 54 puntos. Si Gasol mikutlo og 32 puntos, samtang si Bryant mikimada og 22 puntos.
Sa lain pang mga duwa, ang Indiana Pacers milubong sa Houston Rockets, 133-102, ang Orlando Magic mikulata sa Memphis Grizzlies, 107-92, ang Washington Wizards nakaipsot gikan sa mga kamot sa New Jersey Nets, 109-99.
Gipakaging sa Oklahoma City Thunder ang Minnesota Timberwolves, 116-108, ang New York Knicks midaog batok sa LA Clippers, 113-107 ug ang Golden State Warriors naka-eskapo sa Toronto Raptors bitbit ang 113-112 nga kadaugan. - Gabby G. Malagar gikan sa NBA.com (BANAT NEWS)
- Latest
- Trending
