CEBU, Philippines - Andam na ang tanan alang sa pagpahigayon sa Yaw-Yan Ardigma Martial Arts Federation, Inc. Summer Clinic diha sa fourth floor sa Coast Pacific Downtown Center atbang sa University of Cebu (UC)-main campus sa dalan Sanciangko, ning siyudad.
Si Yaw-Yan Ardigma CEO/Founder ug Vis-Min director Master Benigno 'Ekin' R. Caniga Jr. mipahibalo nga padayon pa gihapon sila sa pagpanawat og mga estudyante nga interesadong makat-on sa Yaw-Yan Martial Arts.
Ang Yaw-Yan Ardigma nga naila usab nga “Sayaw ng Kamatayan” (Dance of Death), usa ka Filipino Martial Arts nga unang misulbong niadtong tuig 1972 ubos sa pagpangulo sa orihinal nga Grand Master Napoleon 'Nap' A. Fernandez.
Ang Yaw-Yan usa ka martial arts nga mogamit sa nagkadaiyang parte sa lawas isip hinagiban sama sa sukmag, patid, head ug shoulder butts, siko, tuhod ug ground fighting.
Dugang pa ni Caniga nga numero unong tumong sa ipahigayon nilang summer clinic mao ang pagtudlo sa mga kabatan-onan og self-defense karong panahon sa bakasyon ug ipalayo sila sa bisyu ilabi na sa ilegal nga drogas.
Lakip sa mga kurso nga lakip sa maong summer clinic mao ang arnis, boxing, fitness, Yaw-Yan Combat (self-defense), Yaw-Yan Ardigma System ug Mixed Martial Arts (MMA).
Alang sa dugang pang mga detalye, mahimong motawag sa numero 0919-8215582 o 0932-7316232. – BANAT NEWS