CEBU, Philippines - Panimalos maoy bugtong tuyo ni bantamweight prospect Michael Domingo sa ALA Gym sa iyang pakigsangka batok ni Colombian Luis Melendez.
Si Melendez maoy responsable sa pagpahunong sa karera sa iyang higala ug stablemate nga si Z 'The Dream' Gorres.
Ang kanhi WBO Oriental bantamweight champion nga si Domingo ug Melendez maoy magbinukbukay sa main event sa "Hangad na Paghihiganti" boxing card nga gikatakda karong Mayo 1 diha sa Pacific Grand Ballroom sa Waterfront-Cebu City Hotel and Casino.
Atol sa press conference kagahapon didto sa Patio Isabel, si Domingo mipahungaw sa iyang pagmaya sa dakung kahigayonan nga gihatag kaniya sa ALA Boxing Promotions aron makasangka si Melendez.
Giklaro ni Domingo nga mamahimong personal ang iyang pakigsangka batok ni Melendez, kinsa maoy nakaingon sa insidente nga gidangatan ni Gorres niadtong Nobiyembre 13 didto sa House of Blues sa Mandalay Bay Hotel sa Las Vegas.
Gisaysay ni Domingo nga mitulo ang iyang luha human niya masayri ang nahiaguman ni Gorres bisan tuod og kini nidaog. Si Gorres gipaubos og brain surgery didto sa University Medical Center human mawad-i og panimuot ibabaw sa ring.
Gitataw ni Domingo nga wala siya’y kahadlok batok ni Melendez bisan og nabantog kini nga usa ka knockout artist. Matud pa ni Domingo nga usa ka gira ang masaksihan sa mga Sugbuanon tungod kay dili niya atrasan bisa'g usa ka tikang si Melendez.
Si Domingo naghupot og 39-14-2, 17KOs, samtang si Melendez adunay rekord nga 26-5-1, 21KOs.
Sa iyang bahin, si ALA Promotions president Michael Aldeguer mibutyag nga dakung tahas ni Domingo nga mohimo og usa ka impresibong kadaugan batok ni Melendez aron mahayagan ang dugay na niyang gipangandoy nga mo-away og world title.
Nasayran, si Domingo gitanyagan sa makaduha ka higayon aron moaway alang sa world title, apan maong mga tanyag pulos nakanselar.
Si Domingo mao unta ang orihinal iparang ni WBO champion Fernando Montiel alang sa Pinoy Power, apan kalit lang miatras ang Mehikano pipila ka semana sa wala pa ang away. – BANAT NEWS