CEBU, Philippines - Nadaog ni Chucky Alcidera ang labing taas nga dungog sa 1st Alex Binghay/Ian Zambo 10-Ball Open Tournament didto sa lungsod sa Barili, Cebu.
Si Alcidera sa Brgy. Open sa Lapu-Lapu City mipukan ni Ericson Ditan sa Barili, Cebu sa kampiyonato.
Mi-okupar sa ikatulo si Candidto Oco sa Cebu City.
Si Alcidera mibulsa og P10,000 alang sa maong kadaugan, si Ditan nakaangkon og P7,000 ug si Oco nakadawat og P5,000.
Mikompleto sa top eight winners mao sila si Ricky Etang sa San Fernando, PO1 Joesanne Magalzo sa Moalboal, Lian Abad sa Barili, Roberto 'Payat' Ancheta sa Davao City ug Allan 'Egat' Villegas sa Barili.
Si Rene Alquizola, kinsa milansar pagka-konsehal sa Barili mitug-an sa Banat News nga nalingaw kaayo ang mga Barilinhon sa maong duwa ug labaw sa tanan ang mga hamtong ug batan-on nga mahiligon sa bilyar.
Matud ni Alquizola nga ang maong duwa usa sa gikalingawan karon ilabi na sa mga batan-on ug nakaabag kaayo kanila sa paghalad sa ilang panahon sa maong matang sa duwa inay mosulod ngadto sa mga dautang bisyo.
Dugang ni Alquizola nga iya sab gisuportahan ang proyekto ni Perave Paras, kinsa maoy organizer ug presidente sa Barili Billiards Association sa paningkamot niining mapalambo ang maong matang sa paugnat sa kusog sa ilang lungsod uban sa abag sa pipila ka mga lokal nga opisyal sa maong lungsod. (BANATNEWS)