Cabahug nangahas

CEBU, Philippines - Nangahas si Keken Cabahug sa Cyrus Racing nga mokadlit og sunod-sunod nga daog sa duha ka stock categories sa pagsikad sa 2nd leg sa 2010 Honda Motorworld Underbone Circuit Racing nga mosikad karong adlawa diha sa Kartzone sa Panagdait, Brgy. Mabolo, ning siyudad.Samtang si Mario Borbon sa X-Racing, modepensa sab sa iyang korona sa open division sa 110 ug 125 class.

Si Cabahug, kinsa gipaluyohan sab sa Honda Motorworld ug si Borbon gilaumang makasugat og lisud nga hagit gikan sa mga tang-ang riders sama nila ni Mark Capoy, Moises Muñoz, Gary Caneda ug Lyndon Requilme ug uban pa.

Ang kompetisyon naglakip sa 4-automatic scooter class alang sa tanang nidaog og Honda Beat, 110-115 super stock alang sa beginners ug novice, 125 super stock alang sa beginners ug novice open.

Ang tanang partisipante ug ingon man ang mga manan-aw makahigayon sa pagdaog og mga butang nga ripahon kun makapakita kini og bisan unsa nga   logo sa Honda Motorworld atol sa ilang pagsulod sa binyu.   (BANATNEWS)