CEBU, Philippines - Nangayo pa og overtime ang San Marino Corned Tuna-USC Warriors una nila gipalayas ang PTT Fuels-UV Lancers pinaagi sa pag-iskor og 98-90 nga kadaugan sa ilang tinaktakay nga duwa ug aron pag-abante sa finals sa 4th CESAFI Partner's Cup kagahapon didto sa Cebu Coliseum.
Tulo ka Warriors ang miduslak og dili momenos 20 puntos nga gipangulohan ni Michael Cantonao pinaagi sa iyang 24 puntos lakip ang triple sa katapusang 10 segundos sa regulasyon nga nakapatabla sa iskor, 81-all aron ihatod ang duwa sa overtime.
Si Joven Cid Cortes mipaabante og balik sa Warriors, 83-81 ug napun-an pa kini og laing sayes puntos aron pagposte og 89-83 nga bentaha sa nahabiling 2:04 sa overtime.
Ang Lancers wala na makarekober sukad niadto ug ang labing maayo nilang nahimo mao ang paglaslas sa labaw ngadto sa kuwatro puntos, 90-94 sa nahabiling 34 segundos sa kumbati.
Si Sam Hermosa miabuno og 22 puntos alang sa Warriors, samtang si Giovanni Padillo miariya og 2-0 puntos. Si Cortes miposa og 16 puntos.
Gumikan sa maong kadaugan, ang Warriors makigsangka batok sa Ave Maria Sanctuary Park-USJR Jaguars alang sa kampiyonato.
Ang USJR Jaguars nakasud sa finals human giharos ang duha ka duwa batok sa semifinalist Aerosol-USPF Panthers.
Si Eman Calo maoy nangulo sa pilderong Lancers pinaagi sa iyang 22 puntos, samtang ang torotoy nga si John Paul Abad miligwat og 19 puntos. Sila si Olivares ug Edrian Lao parehong adunay 14 puntos sa maong kapildihan.
PUNTOS MATAG USA
San Marino-USC (98) - Cantonao 24, Hermosa 22, Padillo 20, Cortes 16, Otida 6, Bautista 3, Codilla 2, Bercede 2
PTT Fuels-UV (90) - Calo 22, Abad 19, Lao 14, Olivares 14, Mercader 8, Señeris 5, Cabahug 2, Silva 2, Enterina 2 (BANATNEWS)