Sinukmagay sa Mandaue City Plaza

CEBU, Philippines - Sa makausa pa, ang SGG Sports Promotions ni Sammy Gello-ani mopasiugda og laing sinukliay og kumo diha sa Mandaue City Plaza Square karong Sabado sa gabii.

Sa main event, si WBO Oriental lightweight champion Anthony 'Rocky' Marcial mopakita na sab og aksiyon batok ni Daryll Pucdol.

Mohimo usab sa iyang professional debut fight ang amateur Philippines lightweight national medallist   Adonis Cabalquinto, kinsa makigbinukbukay batok ni Alde Sosa sa ilang six-round bout.

Ang umaabot nga junior bantamweight prospects nga sila si John Mark Apolinario ug Jason Geda magsinukliay sab og kinumo, samtang ang knockout artist gikan sa Manila nga si Jose Ocampo ang makigharung   batok ni Jaime Barcelona sa ilang junior lightweight showdown.

Si Rodney Rafols manalipod sa walay buling nga rekord sa iyang pakigsangka batok ni Edison Serrano sa mini flyweight bout ug si Edward Penerio sa Yraola Boxing gym moharong ni Andy Seneres.

Laing walay pildeng mini flyweight nga si Ivan Soriano makigbinukbukay ni Jayme Bermeso, samtang ang igsuon ni Rocky ug national team member Angelo Marcial makigsangka batok ni Edmar Tuñacao sa Mandaue City.

Mokompleto sa maong boxing card mao sila si Anthony Sabalde batok Jerpol Valero ug Virgilio Silvano batok Junio Salvador. – BANAT NEWS