Ave Maria SP, San Marino CT naka-una sa series

CEBU, Philippines - Ang topseeds Ave Maria Sanctuary Park-USJR Jaguars ug ang San Marino Corned Tuna-USC Warriors mipukan batok sa ilang tagsa-tagsa ka kaatbang aron maka-una sa ilang "best-of-three" semifinal series niadtong Domingo sa gabii sa 4th CESAFI Partner’s Cup didto sa Cebu Coliseum.

Gipukan sa Jaguars ang elimination round topnotcher Aerosol-USPF Panthers sa iskor nga iskor nga 83-70, samtang ang Warriors mipamatuod nga dili tsamba ang ilang   78-74 nga kadaugan batok sa PTT Fuels-UV Lancers atol sa elimination round dihang mikulit kini og laing daog, 105-94.

Dili na bag-o alang sa Warriors ang pagpukan sa Lancers. Dihang nag-abot sila sa CESAFI finals niadtong 2006 ug 2007 seasons, ang Warriors mi-iskor sab og upset, apan ang Lancers maoy mipatigbabaw.

Niadtong Domingo, ang Warriors nagpakita nga sila maoy mas preparado sa maong engkwentro dihang ilang girakrakan og makabungog nga 31-10 rally ang Lancers sa third period ginamit ang nag-aso asong tirada sa gawas ug mga three-pointers nilang Michael Cantonao ug Sam Hermosa.

Si Cantonao maoy nangu sa Warriors sa iyang 24 puntos, samtang sila si Sam Jordan Hermosa ug Joven Cid Cortes miamot og 17 puntos matag usa.

Si Phil Mercader maoy topscorer sa Lancers pinaagi sa iyang 26 puntos, gisundan ni Ralf Olivares nga adunay 14 puntos.

Sa laing bahin, sila si Manny Gabas ug Armand Ponce nagkumboya og 26 puntos aron   pangulohan      ang Jaguars pagbuntog sa Panthers.

Ang Panthers kinsa maoy mipalagpot sa Enervon-UC Webmasters sulod sa duha ka duwa, gipangulohan sab ni Fritz Dajalos, kinsa miburak og 24 puntos ug gisundan nilang Elvis Labares ug Dennis Ferraren nga parehong adunay 11 puntos.   (BANATNEWS)