CEBU, Philippines - Mag-abot na usab ang mga tang-ang riders dinhi sa Sugbu sa PTT-PSR Underbone Racing karong Marso 31 didto sa Sitio Bacus, Brgy. Pulang Bato, ning siyudad.
Ang lumba gibahin sa lima ka kategoriya -- expert, beginners, novice, motocross ug habal-habal division nga bukas alang sa mga lumolupyo sa Pit-os.
Usa ka buwan human niya gidominar ang 2010 Arturo Radaza Underbone Challenge didto sa Lapu-Lapu City, si international riding sensation Jon Eleazar Adlawan sa PSR Racing moladlad na sab sa iyang katakus batok sa mga dekalibreng riders dinhi sa Kabisay-an.
Si Adlawan mao karon ang nag-unang kandidato alang sa “Rider of the Year” (ROY) award sa PTT Racing human niya giharos ang katapusan niyang lumba bitbit ang 24 puntos ug nag-una sab siya karon sa expert category.
Hinuon, ning higayona, si Adlawan mag-atubang og hugot nga kompetisyon batok sa mga riders gikan sa Bohol, Dipolog ug Dumaguete.
Uban ni Adlawan sa Team Cebu mao ang managsuong Juvenile ug Jobannie Abellar, Menard Ladeza sa Matt Racing, Alphy Bartolada sa UMC Team ug reigning Rider of the Year Gary Caneda Jr. sa CTR Racing Team.
Ang maong lumba gipasiugdahan sa Power Sports Racing (PSR) Promotions ubos sa liderato ni Jonas Adlawan ug race director Edsel Odulio uban sa suporta sa PTT Lubricants. – BANAT NEWS