Lancers vs. Warriors sa Partner's Cup semis

CEBU, Philippines - Gipalagpot sa PTT Fuels-UV Green Lancers ang Prime Asia Lending-DBTC Greywolves, 95-81 aron maangkon ang katungod sa pakigsangka batok sa San Marino Corned Tuna-USC Warriors alang sa "best-of-three" semifinals series sa 4th CESAFI Partner's Cup niadtong Martes sa gabii diha sa Cebu Coliseum.

Ang laing luna sa semifinals sa collegiate division ilogon sa fourth-seed Enervon C-UC Webmasters ug sa fifth-seed Aerosol-USPF Panthers karong Sabado diin ang modaog maoy moharong sa topseed Ave Maria Sanctuary Park-USJR Jaguars.

Gikontrolar sa UV Lancers ang kinatibuk-ang duwa gawas sa third period diin namugnaw ang ilang duwa nga naghatag og higayon sa DBTC Greywolves pagkitkit sa labaw ngadto na lang sa tres puntos, 50-53 sa basket ni Joseph Villaver.

Nagkainitay ang duwa atol sa gihimong rally sa Greywolves nga miresulta sa pagka-thrown out ni Chris dela Rama sa DBTC nga buot unta modapog ni Harold Cincoflores human sa basket ni Ralf Olivares nga naghatag sa Lancers og 56-50 nga labaw.

 Si Dela Rama na-ejected   sa nahabiling 3:45 sa third period. Siya namasangil ni Mark Anthony Manigque nga hugaw og dinuwaan, ang dili masabtan kun nganong si Cincoflores ang iyang gipahimungtan.

 Si Elmer Mykiel Cabahug, maoy nangulo sa Lancers sa iyang 13 puntos, samtang si Olivares mitampo og 10 puntos.  

Si Celso Colegado mi-iskor g 19 puntos, 16 niini nahimo sa final period. Sila si Vincent Castro ug Jefford Aldave nagkumboya og 23 puntos alang sa Greywolves,  

Puntos Matag Usa

PTT-UV (95) - E. Cabahug 13, Olivares 10, Cincoflores 9, Saycon 9, Auditor 8, Silva 8, Perolino 7, Abad 4, Premacio 3, Mercader 3, Calo 2, Cabahug 2, Rios 2, Manigque 1, Seneris 1

Prime Asia-DBTC (81) - Colegado 19, Castro 13, Aldave 10, Dela Rama 7, Villaver 6, Cinco 5, Cabrilles 5, Lumapas 4, Hernando 3, Espiritu 3, Tirado 2, Mabala 2, Tecson 1, Guba 1. – BANAT NEWS