PTT Fuel-UV Baby Lancers sud na semis

CEBU, Philippines - Misilaob og maayo ang init nga opensa sa PTT Fuels-UV Baby Lancers sa second half aron panitan ang Aerosol-USPF Baby Panthers, 100-77 ug ingon man pag-abante sa semifinal round sa 4th CESAFI Partner's Cup kagahapon diha sa Cebu Coliseum.

Nabitin og uno punto ang UV Baby Lancers sa unang 10 minutos sa duwa, 18-19, apan dali nilang napapas ang labaw, ug human milabaw og 12 puntos nga bentaha sa halftime, 45-33, ilang gipalawman ang labaw sa third period nga nakapaluya sa USPF Baby Panthers paingon na ngadto sa final period.

Ang UV Baby Lancers mirehistro sa ilang labing daku nga labaw nga 22 puntos sa nahabiling otso minutos sa duwa.

Tanang players nga gipasud ni Baby Lancers' coach Delfin Pepito Jr. pulos naka-iskor nga gipangulohan ni Lucky Suan sa iyang 12 puntos. Sila si Gerald Legarde ug Michael David Smith miabuno og 10 puntos matag usa.

Sa laing bahin, si Rommel Diapera, mirehistro og game-high 26 puntos, apan wala kini makatabang sa pagpadaog sa USPF Baby Panthers.

Sa maong kadaugan, ang UV Baby Lancers makigharong sa CESAFI regular season defending champion Bibbo-CIT Wildkittens sa semifinals.

Sa laing sangka sa semis sa secondary division, ang top-ranked Enervon C-UC Junior Webmasters makigbatok sa fourth-seed Ave Maria Sanctuary Park-USJR Baby Jaguars.

Puntos Matag Usa

PTT-UV (100) - Suan 12, Legarde 10, Smith 10, Arong 9, Ybañez 8, Undaloc 8, Flores 7, Dennison 7, Linao 6, Marata 5, Tagalog 5, Nuñez 4, Mendoza 4, Brigoli 3, Regner 2

Aerosol-USPF (77) - Diapera 26, Tudio 16, Divino 9, Beldoro 8, Corcilles 7, Pitogo 6, Gigante 5, Antigua 2, Medaros 2. – BANAT NEWS