Lewkowicz tiwala pa rin kay Sonsona, susunod daw sa mga yapak ni Pacquiao

ARLINGTON--Tiwala si international promoter Sampson Lewkowicz na si dating WBO superflyweight champion “Marvelous” Marvin Sonsona ang susunod sa mga yapak ni Manny Pacquiao sa kabila ng knockout loss nito kay Wilfredo Vazquez, Jr.

Nanghina si Lewkowicz nang mahubaran si Sonsona ng WBO 115-pound title bunga ng pagiging overweight nito bago sagupain si Alejandro Her­nandez kung saan nauwi sa draw ang laban at natalo na­man kay Vasquez para sa ba­kanteng WBO superbantamweight crown.

Ang 19-anyos na si Sonsona ay tinanghal na isang “one-hit wonder” lamang matapos talunin si Juan Lopez para sa suot nitong WBO crown.

“How far Marvin will go is up to him,” sabi ni Lewkowicz, ang nagbigay kay Pacquiao ng una nitong US break nang itapat kay IBF superbantamweight Lehlo Ledwaba noong 2001. “I still think of all the Filipino fighters today, he has the most potential to become the next Pacquiao. He has explosive talent and Manny’s charisma. I consider the draw with Hernandez a loss so in my view, Marvin has to recover from two straight defeats. But whether he recovers or not isn’t up to me or his manager or his trainer. It’s up to him.”

Ikinagulat rin ni Lewkowicz ang ulat na hiniling ni Sonsona kay Cebu promoter Sammy Gello-ani na magtakda ng isang comeback fight sa Mayo.

“If that’s true, I’m flying out to General Santos City on the first flight available,” ani Lewkowicz. “I want to talk to the kid, find out what’s on his mind. If he wants to fight right away, it’s fine. That means his pride is hurting. I just hope he’s learned his lessons from his last two fights.”

Ayon kay Lewkowicz, kung mananalo si Sonsona sa Mayo ay dadalhin niya ito sa Oxnard malapit sa Los Angeles para mage-ensayo sa ilalim ni trainer Gabriel Sarmiento.

Maliban kay Sonsona, natalo rin ang alaga ni Filipino trai­ner Nonito Donaire, Sr. na si Ciso Morales via KO kay WBO bantamweight champion Fernando Montiel.

Sinabi ni Lewkowicz na hindi na si Donaire, Sr. ang hahawak kay Sonsona. 

Kabilang sa mga boksingero ni Lewkowicz na sinasanay ni Sarmiento ay si Sergio Martinez, isang Argentinian na naninirahan sa Spain at hahamon kay WBC at WBO middleweight champion Kelly Pavlik sa Abril 17 sa Atlantic City. (QHenson)