CEBU, Philippines - Gidawat na sa Sugbuanong triathlete Lhoriz Echavez ang imbitasyon aron mamahimong miyembro sa nasudnong koponan.
Ang swimming varsity kaniadto sa University of San Carlos (USC) daan na nga gihaylo sa mga kadagkoan sa TRAP niadto pang miaging tuig, apan iyang gibasura ang maong tanyag gumikan sa daghang mga obligasyon nga iyang giatubang.
Ning bag-o, human milampos sa 21-kilometer nga Standard Chartered Hong Kong Marathon sa miaging bulan, si Echavez nihukom nga moipon sa Philippine team.
Si Echavez, kinsa usa sa mga awardees sa 28th Sportswriters Association of Cebu-San Miguel Beer (SAC-SMB) All-Cebu Sports Awards niadtong Huwebes sa gabii didto sa Casino Español de Cebu, nagkanayon nga siya magbansay-bansay sa Manila, apan mag-ulian siya dinhi sa matag karon ug unya. (BANATNEWS)