Pakuyaw ni Pacquiao

CEBU, Philippines - Pilde si Joshua Clottey apan bun-og sab si Manny Pacquiao. Pabiling kampiyon ang Pambansang Kamao sa welterweight division human siya modaug sa usa ka unanimous decision batok ni Clottey ang boksidor gikan sa Accra sa Ghana, Africa.

Nalipay ang mga dumadapig ni Pacquiao sa iyang kadaogan apan mas daghan ang naglagot tungod sa “killing the time” nga taktika ni Clottey, wala gyud makabuyi ug maayo si Pacquiao aron pagtumba kaniya kay magsige lang kini ug tabon sa nawong ug magpakulata lang sa lawas. Sa kalig-on sa bodega ni Clottey, mo-untol lang usahay ang kumo ni Pacquiao ug didto na niya kini banati og maayo sa 11th ug 12th round aron paglingaw sa katawhan didto sa Cowboys Stadium didto sa Arlington, Texas nga gitambongan ug 51 ka libo ka tawo.

Didto sad misamot kakumbsneir ang tulo ka mga judges nga sila si Duane Ford, Nelson Vasquez ug Levi Martinez aron mopabor kang Pacquiao.Daan na hinoong kontrolado ni Pacquaio ang duwa human lang sa first round apan sa mga rounds mga mibawos sab si Clottey ilabi na didto sa 10th round dihang naka-igo siya og sagunson nga pito ka kumo ngadto sa nawong ni Pacquaio nga iyang gihatod didto daplin sa ring.

Gani nasamad man ang ubos sa tuong mata ni Pacquiao apan nagsunggo sab si Clottey. Ang bentaha lang ni Clottey kay bisan og bun-og sab siyang tan-awon dili maklaro sa telebisyon tungod sa iyang kaitom.

Mihugyaw sab pag-ayo ang mga tawo dihang gidapog ni Pacquiao ang duha ka dunggan ni Clottey tungod kay dili man gyud moundang pagsige og tabon sa iyang nawong ug kadto tataw nga usa sab ka pamaagi ni Clottey aron dili sab siya sayong moligid sa canvass.

Sa wala pa magsugod ang away, nagsayaw-sayaw si Clottey samtang naglakaw padulong sa ring samtang si Pacquiao nagsige sab uog pahiyom samtang nagsul-ob sa iyang sapatos. Makita nimo sa duha ka boksidor nga walay pressure ug ang duha gusto gyud modaug.

Human sa kadaogan ni Pacquiao, kalit lang usab nabanhaw ang dugay nang gipangandoy sa mga boxing fans sa tibuok kalibotan wa’y lain ang iyang away batok kang Floyd Mayweather, Jr.

Didto ako mosaksi sa away ni Pacquaio ug Clottey sa panimalay ni San Miguel Shipping and Lighterage Corporation (SMSLC) nga si Mike Sususco. Layo pa gani ang pista sa Mandaue karong Mayo 8 apan alegre na kaayo ang balay ni Sir Mike kinsa nagpasalida og pay-per-view. Akong nabantayan nga menos og hugyaw ang maong sangka kung itandi sa away ni Miguel Cotto kaniadtong Nobiyembre sa miaging tuig.

Midalit sab si Sir Mike ug iyang asawa nga si Mam Roxanne ug paniudto ngadto sa ilang mga bisita ilabi na ang managtiayong Koreano nga retiradong port captain nga si Simeon Jeung ug asawang si Maria.

Karong umaabot Mayo 2 atol sa away nilang Mayweather ug Shane Mosley, magpasalida na sab pag-usab si Sir Mike og pay-per-view sa ilang balay didto sa Mandaue.

Dili lang didto sa ilang Sir Mike ang gidagsa-an ug daghang tawo apan nagpunsisok sab ang katawhan sa mga restaurants, mga gymnasiums ug mga kabalayan nga nagpasalida ug pay-per-view. Lakip na niini ang Rama compound diin anaa magpuyo si vice-mayor Michael Rama, Customs Police nga si Jingjing Rama kinsa maoy team manager sa Team Pacquaio basketball team dinhe sa Sugbo ug ang atong higala sa CCTN-Channel 47 nga si Ricky Rama Poca nga wala gyu’y paglubad ug nagsige lang og balikbalik og greet o timbaya sa SPORTSgab kaniadtong Huwebes, Marso 11.

Nakahibalo ako nga wala sa’y kabutangan sa kalipay ni Jingjing atol ning bag-ong kadaogan ni Pacquaio.

Nahaw-as ang mga silingan sa mga Rama ug nagpunay ug hugyaw atubangan sa dakong telebisyon nga gitaud luyo sa ilang fitness gym. Dunay sinugba ug kinilaw didto ug gitambongan kini ni Mayor Tommy Osmeña.

CONGRATS Pacman.

Miscellaneous. Belated birthday greetings to my uncle in Poro, Camotes Mr. Narsales Malagar who celebrated his 81st birthdate and also to my nephew Chrastie Senarlo last March 9. My colleagues in the media Mr. Philogen Florita of UV and Roger Paller turned another milestones last March 11. Tomorrow is the birthday of Banat News’ Mr. Barangay Jun Veliganio of GMA-Channel 7. Thanks to my friends in GMA-7 Allan Domingo, Aljin Abaquita and Lou Ann Mae Rondina. More power to the birthday celebrants. Good luck and good health to all of you. - BANAT NEWS