CECABA vs. GAA

CEBU, Philippines - Mopakita sa ilang abilidad sulod sa korte ang CECABA All-Star ni Chester Cokaliong ug GAA All-Star ni Dr. Boy Te sa usa ka exhibition game karong ala-1 sa hapon diha sa City Sports Club-Cebu gym sa Cebu Business Park.

Matawag kini nga "rematch" ang maong duwa kay ikaduha na nila kining panag-abot. Unang nag-abot ang duha niadtong Disyembre 6 diin ang GAA All-Star nidaog sa iskor nga 93-85 didto sa Guadalupe Sports Complex.

Karong adlawa ang CECABA nagpanikad na nga mobawos ug andam na sab si three-point king Cokaliong nga mobuhi sa iyang mga tirada.

Si Cokaliong maghangad sab sa suporta sa igsuon nga si Christopher, uban nilang Joel Chan, Ricky Yu, Samuel Sia, Wilson Yu, Edwin Kaw, Ryan Mendez, Richard Lanutan ug Zotico 'Toko' Tan.

Samtang ang GAA All-Star magsalig nilang Inting Reyes, Jimbo Noel, Joselito Ocampo, Jefrey Diola, Juanito Sasing, Andy Minoza, Calixto Perez, Greg Bamba, Tim Dinampo, Chito Hernandez ug Gaga Cabanilla.   (BANATNEWS)