Z Gorres, Rubilen Amit midawat sa labing taas nga pasidungog

CEBU, Philippines - Duha ka garbo sa Sugbu nga si ALA fighter Z 'The Dream' Gorres ug billiard queen Rubilen Amit ang nakadawat sa labing taas nga pasidungog sa gipahigayong 28th Sportswriters Association of Cebu-San Miguel Beer (SAC-SMB) All-Cebu Sports Awards niadtong Huwebes sa gabii didto sa Casino Español de Cebu.

Si kanhi bantamweight prospect Gorres uban sa iyang kapikas nga si Datches maoy gihatagan sa “Presidential Award” gikan ni SAC president John Z. Pages, isip pasidungog sa kaisog ug garbo nga iyang gidala dinhi sa nasud.

Bisan sa lisud niyang kahimtang, si Gorres mituyo gyud pagbarog gikan sa iyang wheelchair aron personal nga modawat sa golden plaque.

Sa iyang hamubo apan undanon nga pamulong, si ALA Boxing founder Antonio 'Bidoy' L. Aldeguer midayeg ni Gorres ug nanghinaot nga ang nahitabo sa kinabuhi sa boksidor mamahimong inspirasyon sa mga batan-ong atleta.

Gisaysay usab ni Aldeguer nga kuyaw ang nadangatan ni Gorres human kini makuyapi human sa sangka niini batok ni Colombian Luis Melendez niadtong Nobiyembre 14 didto sa Mandalay House of Blues sa Las Vegas.

Giisip ni Aldeguer nga usa ka milagro ang nahitabo sa kinabuhi ni Gorres ug angay lang kini nga himuong sumbanan dili lang sa mga atleta, apan sa tibuok nasud nga Pilipinhon. Bisan og wala niya makuha ang kahigayonan nga mo-away ni Fernando Montiel alang sa WBO bantamweight title, alang kang Aldeguer, si Gorres mao gihapon ang tinuoray nga kampiyon.

Sa iyang bahin, ang two-time SEA Games gold medalist nga si Amit, kinsa mao ang gitahod nga “Athlete of the Year” mipadayag sa iyang dakung pasalamat sa

mga suporta nga iyang nadawat gikan sa mga Sugbuanon.

Si Amit misaad nga padayon siyang mohatag og dungog sa nasud nga Pilipinhon. – BANAT NEWS