UV mihatag P110,000 ngadto ni Gorres

CEBU, Philippines - Ang University of the Visayas (UV) administration ug alumni federation mihatag og P110,000 nga hinabang pinansiyal ngadto sa Sugbuanong boksidor Z 'The Dream' Gorres.

Si Joselito 'Jiji' F. Gullas ug iyang ig-agaw nga si Gerald Anthony 'Didi' Gullas, nga pulos UV assistant vice president for finance and administration, ang miabi-abi sa nag-wheelchair nga si Gorres uban sa iyang asawa nga si Datches ug kinamagulangang anak nga si Dheybert kagahapon sa buntag diha sa UV administration office.

Gawas sa financial assistance, ang kadagkuan sa UV mihatag usab og scholarship ngadto sa usa sa upat ka anak ni Gorres sa secondary ug tertiary education.

Si Z ug si Datches adunay upat ka anak nga sila si Dheybert (7), Sheiladhey (5), Zhey (3) ug si Khodey (5 months old).

Sa pagka karon sumala pang Gullas, seguraduhon usa nila nga matabangan si Gorres pinaagi sa pagpatungha sa usa sa iyang mga anak ug naglaum nga sa umaabot, masuportahan nila ang tanang anak ni Gorres.

Human gideklarar ang iyang "unanimous decision" nga kadaugan batok ni Colombian Luis Melendez niadtong Nobiyembre 13 didto sa Mandalay House of Blues sa Las Vegas, kalit natumba si Gorres ug daling gidala ngadto sa University Medical Center diin didto gihimo ang "brain surgery" human siya ma-comatose tungod sa blood clot.

Sa pagka karon, si Gorres    ipailawom gihapon sa rehabilitasyon aron mapalambo pa ang iyang kahimtang human sa maong insidente nga mitapos sa iyang karera sa boksing.

Si Gorres makadawat og “Presidential Award” sa ipahigayong 28th Sportswriters Association of Cebu-San Miguel Beer (SAC-SMB) All-Cebu Sports Awards karong gabii diha sa Casino Español de Cebu. – BANAT NEWS