Lawis, San Miguel-A mikulit na sab og daog sa SK-FDH cagefest

CEBU, Philippines - Mikulit na sab og daog ang Lawis ug San Miguel-A sa SK-FDH Basketball League diha sa Mayor's Barangay Satellite Gym diha sa Brgy. Lorega-San Miguel.Ang Lawis mipukan sa Lower Lawis (LEYC), 83-72 alang sa ilang ikapitong sunod-sunod nga kadaugan, samtang ang San Miguel-A mibuntog sa San Miguel-B sa iskor nga 87-78.

Kontrolado sa Lawis ang maong duwa gikan sa pagsugod ug miposte kini sa labing daku nilang labaw, 72-54 sa nahabiling 3:04 sa third period.

Misuway og gukod ang LEYC sa final period, apan nakawang lang ang ilang mga paningkamot kay nakabsan na sila sa oras.

Ang forward nga si Joseph Bayloses miposa og 20 puntos, samtang si Bryan Ruelan miabuno og 15 puntos alang sa Lawis, kinsa miabante na sa quarterfinals.

Ang pilderong LEYC gipangulohan ni Charlo Camahaig, kinsa mipupo og 16 puntos.

Sa laing bahin, si Francis Rafols mipabuto og 18 puntos aron pangulohan ang San Miguel-A sa ilang ikalimang sunod-sunod nga kadaugan, samtang si Walter Cuevas mao sab ang topscorer sa naparot nga San Miguel-B. – BANAT NEWS