CEBU, Philippines - Ang Mawin’s Kitchen nilang team owners Sherwin Lequit ug Maia Adriatico mipukan sa Victor Village Residents Association (VVRA), 73-68 sa JS Contractor’s Cup 2010 summer basketball tournament diha sa Vicente Memorial Gym sa barangay Punta Princesa, ning dakbayan.
Sila si Egin Taborada ug Mat Vallejo miposte og 14 puntos matag usa, samtang ang managsuong Sherwin ug Stanley Lequit mihipos og 13 puntos matag usa alang sa Mawin's Kitchen nga temporaryo karong nag-una sa liderato bitbit ang 3-1 nga baraha.
Human sa 53-all nga panagtabla paghuman sa third period, ang Mawin's mipatuman sa ilang hugot nga depensa sa final quarter nga maoy gihimo nilang hinagiban pagpukan sa VVRA.
Sa sayo pa, ang Panthers mikitkit sa Jacpat Shee, 65-40 aron pagkulit og 2-2 nga baraha.
Si Gob Baclaan maoy nangulo sa Panthers nga milawog og 18 puntos, samtang sila si Sam Vallejo ug Weweng Ibrada mihungit og 13 puntos matag usa.
Ang Jacpat Shee, kinsa midailos ngadto sa 1-3 nga baraha, gipangulohan nilang Dondon Padigos ug Jet Iyana nga parehong mi-iskor og 11 puntos.
Puntos Matag Usa
Unang duwa:
Panthers (65) - G. Baclaan 18, S. Vallejo 13, Ibrada 13, A. Vallejo 6, Padigos 5, R. Baclaan 5, Yray 5
Jacpat Shee (40) - Padigos 11, Iyana 11, r. Canencia 6, Z. Canencia 6, Poblete 3, J. Canencia 2, Villarba 1
Ikaduhang duwa:
Mawin’s (73) - Taborada 14, Vallejo 14, Sh. Lequit 13, St. Lequit 13, Virtudazo 5, N. Empenado 4, Madrelino 4, D. Vinalon 2, Tecson 2, Tecson 2, Bouffard 2
VVRA (68) - N. Carungay 20, Villejo 13, Moreno 10, Quiroz 8, G. Empenado 5, Bario 5, Velez 4, Liboon 2. – BANAT NEWS