CEBU, Philippines - Mi-iskor og 2-0 nga kadaugan ang Pajo batok sa hiniusang puwersa sa Bankal ug Abuno aron pag-angkon og bentaha sa men's open division sa Denker League 2010 football tournament didto sa dakbayan sa Lapu-Lapu.
Ang Pajo nga midaog mikulit sab og 7-0 nga kadaugan batok sa Metropolitan Lapu-Lapu, nagbitbit karon og 8-4 nga baraha sa goals gisundan sa FC Looc nga adunay siyete puntos human magtabla ang ilang duwa, 2-all uban sa Metropolitan.
Ang Vuda nga maoy nag-una kaniadto, nalagpot sa ikatulo nga dapit uban ang sayes puntos ug 10-0 goals, gisundan sa Bankal-Abuno nga adunay kuwatro puntos ug 6-13 goals. Ang Olango mi-okupar sa ikalima sa ilang uno punto ug 3-4 goals, samtang ang Metropolitan adunay uno punto ug 2-14 goals.
Sa 14-under category, ang Abellana Football Club mitamparos sa MABES, 10-0 sa boys bracket, samtang ang ilang girls counterparts mikulit og 13-0 batok sa MABES. Ang MABES Boy, miposte og 3-0 nga kadaugan batok sa Olango.
Sa 12-under division, ang Central-A milampurnas sa MABES, 10-1. (BANATNEWS)