Singwangcha misakmit sa s'featherweight belt

MANILA, Philippines - Milampos si Cebuano-based Thai fighter Jesus Muzaka Singwangcha pagsakmit sa Philippine Boxing Federation super featherweight title human midaog pinaagi sa "unanimous decision" batok ni Jovie Merca niadtong miaging gabii sa ‘Bakbakan sa Bayawan’ didto sa Bayawan City Transport Terminal grounds sa Bayawan, Negros Oriental.

Si Singwangcha migamit sa iyang kasinatian aron dabo-dabohan ang taga-Butuan City nga si Merca.

Sa supporting main event, midaog usab sa puntos si Jayson Egera Singwangcha sa Siaton, Negros Oriental ang Sugbuanong si Gedion Amba alang sa PBF junior featherweight belt.

Natumba si Singwangcha sa fourth round human maigo sa makusog nga hook ni Amba, apan dali kining nakabangon ug gikan niadto mao na midala sa away hangtod sa katapusang bagting sa kampanilya.

Sa undercard, si Marlou Sandoval sa Negros Oriental mipukan ni Junrey Sta. Ana sa Cebu pinaagi sa unanimous decision, laing Sugbuanong boksidor nga si Christian Saga mikulata ni Chaiyo Singwacha sa Negros Oriental.

Nalukapa usab ang taga-Mandaue nga si Jerome Bontog human siya maigo sa suntok ni Marco Demecillo sa Iligan City ug si Jestoni Pepito sa Masbate midaog pinaagi sa unanimous decision batok ni Jayson Geda sa Mandaue.

Ang maong boxing event namugna sa hiniusang pwersa sa Rex ‘Wakee’ Salud (RWS) Promotions ug Singwangcha Promotions.   (BANATNEWS)