CEBU, Philippines - Pormal nang nakasulod sa semifinals ang no. 2 seed Bibbo-CIT Wildkittens ug fourth-ranked Ave Maria Sanctuary Park-USJR Baby Jaguars human mitukob og daog batok sa tagsa-tagsa ka karibal kagahapon sa secondary matches sa 4th CESAFI Partner's Cup diha sa Cebu Coliseum.
Yano kaayong misungkab og daog ang Wildkittens human nila gilubong ang Prime Asia Lending-DBTC Junior Greywolves sa iskor nga 91-70, samtang ang Baby Jaguars kinahanglan pa nga mokayod sa nanghinapos nga bahin sa fourth period aron maangkon ang 78-65 nga kadaugan batok sa San Marino Corned Tuna-USC Baby Warriors.
Ang duha parehong nagbaton og "twice-to-beat" advantage ug nagpaabot na lang kini sa mamahimo nilang kaatbang sa semifinals.
Mag-ilog sa katapusang lingkoranan sa semis mao ang third seed PTT Fuels-UV Baby Lancers ug Aerosol-USPF Baby Panthers sunod semana, diin ang topseed Enervon C-UC Junior Webmasters nakaangkon og automatic slot isip top qualifier.
Ang tandem nilang Franklyn Batiquin ug Mark Jayven Tallo maoy gihimong hagdanan sa Wildkittens pagkab-ot sa daog. Si Batiquin mipupo og 15 puntos, samtang si Tallo miani og 14 puntos.
Si Chris Yap maoy topscorer sa Junior Greywolves nga miposte og 20 puntos.
Sa laing bahin, ang Baby Jaguars wala kaayo mopagawas sa ilang tinud-anay nga duwa sa first half nga yano kaayong misikop og labaw ug padayon kini mibubo og mga puntos sa third period aron pagposte og 44-24 nga bentaha.
Apan ang Baby Jaguars mitakilid sa fourth period human mi-rally ang Baby Warriors ubos sa pagpangulo ni Anthony Gai Romaguera, kinsa mi-iskor og 18 puntos sa second half hinungdan nga nakan-an ang ilang labaw.
Naulian ang kalagsik sa Baby Jaguars dihang mikiat sab si Clint Muñez sa final period aron luwason ang koponan gikan sa mga kamot sa Baby Warriors.
Si Muñez milansang og nuybe puntos, lakip na ang tulo ka sunod-sunod niyang lay-ups, apan si Arlister Escatron maoy nangulo sa kadaugan pinaagi sa iyang 14 puntos.
Bugtong si Romaguera lang ang nakakuha og double figures alang sa pilderong Baby Warriors.
PUNTOS MATAG USA
Unang duwa:
Bibbo-CIT (91) - Batiquin 15, Tallo 14, Tejam 12, Sanchez 9, Nalos 8, Koinio 6, Pamaong 4, Figuracion 4, Bancale 3, Velez 3
Prime Asia-DBTC (70) - Yap 20, Abelgas 10, Hugo 9, Nemenio 9, Tabasa 6, Languido 6, Mellijor 3, Ruiz 3, Villaroza 2, Haben 2, Niere 2 (BANATNEWS)