Luna sa semis tumong sa USC, UC

CEBU, Philippines - Tinguha sa second-seed San Marino Corned Tuna-USC Warriors ug fourth ranked Enervon C-UC Webmasters nga mo-abante sa semifinals sa ilang pakigsangka batok sa tagsa-tagsa nila ka kaatbang sa collegiate division sa pagsugod sa 4th CESAFI Partner's Cup quarterfinals karong hapon diha sa Cebu Coliseum.

Ang Warriors makigsangka batok sa no. 7 Bibbo-CIT Wildcats ug ang Webmasters makigharong batok sa no. 5 Aeorol-USPF Panthers.

Parehong naghupot og "twice-to-beat" advantage, ang Warriors ug Webmasters kinahanglan modaog karon aron pormal na nga makasud sa semis.

Mao sab ang sitwasyon sa secondary division diin ang no. 2 seed Bibbo-CIT Wildkittens moabante sab dayon sa semifinals sa higayon modaog sila batok sa dinaog-daog nga Prime Asia Lending-DBTC Junior Greywolves sa opener karong adlawa, samtang ang no. 4 Ave Maria Sanctuary Park-USJR Baby Jaguars mosuway sab pag-abante sa semifinals batok sa    San Marino-USC Baby Warriors.

Wala kaayo maglisod ang Warriors pagpukan sa Wildcats dihang nag-abot ang ilang dalan sa elimination, apan sukwahi ang nahitabo sa Webmasters diin naglisud kini, salamat ni kanhi Panther Moncrief Rogado nga gisalbar niya ang iyang koponan pinaagi sa iyang winning-shot aron pagposte og 74-72 nga kadaugan.

Ang Warriors gilauman na sab nga moparada nila ni Sam Hermosa, Joven Cid Cortes, Michael Cantonao, Giovanni Padillo ug sa nagka-asenso nga si Francis Luigi Bercede. .

 Ang Wildcats aduna lay higayon pagdaog kun mobalik kanila ang ilang head coach   Gilbert Demape ug ang duha ka beteranong sila si Jerry Jaca ug Gerry Cavan aron makighugpong nilang Sherwin Abobo, Chester Curso, Arnel Ipang, Sherwin Resilla ug Karen Rick dela Cerna.

Sa laing bahin, ang Webmasters magsalig sa ilang 6-foot-9 center June Mar Fajardo, Kelvin Juliane, Edward Pao, Rommel Luceno ug Kevin Quilantang nga maoy moalkontra sa puwersa sa mga pambato sa Panthers sama nila ni Elvis Labares, Michael Sereno, Elwin Durano, Ellison Rivera ug Fritz Dajalos. – BANAT NEWS