CEBU, Philippines - Andam na ang tanan alang sa 5th Paghandum ni Magsaysay (PNM) Adventure Race Climbathon ug 7th PNM Mountainbike Challenge karong Marso 20-21 didto sa Mt. Manungal sa Balamban, Cebu.
Ang lumba gibuak ngadto sa upat ka kategoriya --open elite, executive women’s ug local class.
Lahi sa miaging tuig, ang lumba giisip karon nga mas lisud kay gipun-an ang gilay-on niini gikan sa 15 kilometros ngadto sa 18 kilometros.
Ganting salapi ang nagpaabot alang sa mga kampiyon matag dibisyon.
Ang modaog sa open/elite category makadawat og P10,000, ang second ug third placers makaangkon og P7,000 ug P5,000 matag usa.
Ang top three finishers sa executive, women’s ug local mobulsa og P5,000, P3,000 ug P1,000 matag usa.
Si Balamban Brgy. Councilor Dave Karamihan, ang chairman ug municipal director sa lumba, nagkanayon nga gawas sa paghandum sa ika-53 nga kasumaran sa pagkamatay ni anhing Presidente Ramon Magsaysay, tumong usab sa maong lumba mao ang pagpakita sa kaanindot sa Mt. Manungal.
Namugna ang kalihukan pinaagi sa hiniusang pwersa sa Cebu Provincial government ni Gov. Gwen Garcia, Congressman Pablo John Garcia, San Miguel Beer, Smart Communications, GAMA Eco-Tourism Development Center Inc. ug municipality sa Balamban.
Alang sa dugang mga kasayoran, mahimong motawag ni Dave sa numero 09228418 ug 4652399 o ni Jackie sa numero 333-2190 ug 4650355. – BANAT NEWS