Niños Pilde sa Gilas

CEBU, Philippines - Wala kaugpo ang M. Lhuillier Kwarta Padala-Cebu Niños sa mas tag-as ug mas idlas nga Smart Gilas Team Pilipinas human mapilde, 70-83 sa unang adlaw sa ilang exhibition match kagabii diha sa Cebu Coliseum.

Ang 6-foot-9 ug kanhi top pick sa PBA nga si Japeth Aguilar mibubo sa iyang kinatibuk-ang 10 puntos sa final period aron abagan ang Smart Gilas pagkutlo og daog batok sa Niños.

Giladlad dayon ni Niños import Jason Dixon ang iyang abilidad ug miguba sa lig-ong depensa sa sentrong si Greg Slaughter sa Gilas.

Si Dixon mipupo og 10 puntos sa first period alang sa Niños, kinsa milabaw og otso puntos, 23-15 sa maong kuwarter. Apan gikan niadto igo na lang siya nakahimo og uno punto kay naglisod na kini pagpasulod sa iyang mga tirada tungod sa hugot nga depensa nga gipatuman sa Gilas.

Ang upat ka free throws ni JV Casio gikan sa technical foul ni Woodrow Enriquez maoy nakapasikit sa Gilas ngadto sa Niños, 41-43 sa nahabiling otso minutos sa third period.

Ang Gilas milusad og 15-4 nga rally aron pagposte og 10 puntos nga labaw sa final period, 73-63. Ang duha ka sunod-sunod nga slam dunk ni Aguilar maoy miselyado sa kadaugan.

Si Chris Tiu maoy topscorer sa Gilas sa iyang 16 puntos, samtang ang pilderong Niños gipangulohan ni Stephen Padilla nga adunay 13 puntos. samtang si Dixon mihipos og 11 puntos. – BANAT NEWS