Rogado miluwas sa Enervon-C

CEBU, Philippines -  Mipasulod sa iyang mahinungdanong basket si Moncrief Rogado sa nahabiling 1.5 segundos aron luwason ang Enervon-C/UC Webmasters gikan sa mga kamot sa Aerosol-USPF Panthers, 74-72 sa 4th CESAFI Partner's Cup niadtong miaging gabii diha sa Cebu Coliseum.

 Sa maong kadaugan, ang UC Webmasters nakaangkon og ikaupat nga dapit ug nakabaton og "twice-to-beat" advantage batok sa no. 7 qualifier sa sunod nga hugna sa torneyo.

Sa laing duwa, nasumpo sa PTT Fuels-UV Lancers ang tinguha sa Ave Maria Sanctuary Park-USJR Jaguars sa pagkulit og 6-0 sa elimination round sweep human miposte og 82-72 nga kadaugan sa usa ka "non-bearing" game. Kini gumikan kay ang Jaguars segurado na nga no. 1 sa elimination round, samtang ang Lancers nalandig sa ikatulo. 

Ang elimination round tapuson karong adlawa diin ang second placer San Marino Corned Tuna-USC Warriors makigsangka batok sa Prime Asia-DBTC Greywolves.

Ang top four teams nakompleto na niadtong Domingo ug ang Jaguars mi-abante na sa semifinals ug maghuwat na lang sila sa resulta sa quarterfinals nga sugdan karong Sabado, Marso 6.

Pabiling gi-ilogan karon mao ang ikalima ug ikaunom nga dapit tali sa Bibbo-CIT Wildcats ug sa Aerosol-USPF Panthers. 

 Napatabla sa higanteng sentro sa UC June Mar Fajardo ang iskor, 72-all, ug ang USPF aduna pay 11 segundos aron maangkon ang daog,   apan kalit nga nabuhian ni Michael Sereño   ang bola dihang   madakin-as kini sa kadangog sa korte. Ang iyang teammate nga si Ellison Rivera mosuway unta og luwas sa bola apan gitawgan kini og stepping violation.

 Atol sa inbound, gihatag ni Edward Pao ang bola ngadto kang Rogado, kinsa midukdok una og katulo sa wala pa siya motira og pinatugbaw ubos sa free throw line aron pagkandado sa kadaugan.

Si Rogado, niduwa kaniadto uban sa USPF Panther sa wala pa siya mobalhin sa UC.

Si Rogado igo lang mihimo’g 11 puntos, apan si Kelvin Juliane maoy nangu sa Webmasters sa iyang 21 puntos lakip na ang upat ka triples.

 Ang torotoy nga si Randy Avila,   maoy nangu sa Panthers pinaagi sa iyang 11 puntos, gisundan nilang Elwin Durano ug Rivera nga adunay 10 puntos matag usa.

 Sa laing bahin, si Harold Cincoflores mipabuto og 15 puntos aron pangulohan ang Lancers, samtang si Aniceto Lapiz Jr. mibugha og 11 puntos alang sa pilderong Jaguars.

PUNTOS MATAG USA

Unang duwa:

Enervon-UC (74) - Juliane 21, Rogado 11, Fajardo 9, Mohammad 7, Gomez 5, Ampoon 4, Ypil 4, Delos Santos 3, Pao 3, Luceno 3, Miranda 2, Batino 1

Aerosol-USPF - Avila 11, Rivera 10, Durano 10, Tinoy 9,Dajalos 8, D. Ferraren 6, Labares 4, Bardillas 4, Filoteo 3, Ferraren 3, Misa 2, Sereno 2

Ikaduhang duwa:

PTT-UV (82) - Cincoflores 15, Lao 13, Saycon 9, Manigque 7, Calo 7, Abad 7, Silva 6, Rios 6, Mercader 5, Auditor 3, Seneres 2, Premacio 2

Ave Maria-USJR (72) - Lapiz 11, Gabas 9, Senining 8, Bibera 8, Amores 8, Suliman 7, Delfino 4, Villaver 4, Dela Rama 4, Bucayan 3, Duran 3, Dela Pena 2, Ponce 1   (BANATNEWS)