Isa na lang sa Giants
MANILA, Philippines - Matapos walisin ang Gin Kings sa semifinal round, nabaon naman ang Aces sa 0-3 sa kanilang championship series ng Giants.
Sinandalan sina KG Canaleta, James Yap at Kerby Raymundo sa final canto, tinalo ng Purefoods Tender Juicy ang Alaska, 79-78, sa Game Three ng kanilang championship series upang makalapit sa inaasam na korona ng 2009-2010 PBA Philippine Cup kagabi sa Araneta Coliseum.
Itinaas ng Giants sa 3-0 ang kanilang bentahe kontra Aces sa kanilang best-of-seven titular showdown.
Tumipa si James Yap ng 14 marka para sa Purefoods kasunod ang 12 ng nagbabalik na si PJ Simon at tig-8 nina Raymundo, Canaleta, Marc Pingris at Rafi Reavis.
May pagkakataon ang SMC franchise na makamit ang kanilang pang limang All-Filipino trophy na duduplika sa nakuha ng maalamat na Crispa Redmanizers at pang walo sa kabuuan.
“As much as we’re up 3-0, it takes four wins to wrap up the series,” ani coach Ryan Gregorio, puntirya ang kanyang ikatlong PBA crown.
Bumangon ang Purefoods mula sa isang 13-point deficit, 42-55, sa gitna ng third period sa likod nina James Yap, PJ Simon at rookie Rico Maierhofer upang makadikit sa 59-64 sa 1:03 nito.
Muling nakalayo ang Alaska sa 73-66 sa 7:14 ng fourth quarter mula kina Tony Dela Cruz at John Ferriols hanggang kunin ang 77-74 lamang sa 3:06 nito na siya na nilang pinakahuling abante.
Tatlong turnovers ang nagawa ng Aces na nagresulta sa three-point shot ni Canaleta at layup ni Raymundo upang ibigay sa Giants ang 79-77 bentahe sa huling 57.1 segundo.
Ang split ni Willie Miller sa natitirang 31.3 segundo ang naglapit sa Alaska sa 78-79 kasunod ang mintis na tres ni Canaleta sa posesyon ng Purefoods sa huling 19.4 segundo. (RC)
- Latest
- Trending
