CEBU, Philippines - Nasakmit sa Power Forty Selection ug sa Minglanilla Basketball Association (MIBA) ang luna sa finals diin mag-abot sila alang sa best-of-three championship showdown human ilang gipalagpot ang ilang tagsa-tagsa ka kaatbang kaniadtong Sabado sa gabii sa nagpadayong Cebu Golden Basketball League (CGBL) didto sa Inayawan Sports Complex.
Ang Power Forty kinsa misandig pag-ayo kanilang Michael Arias ug Stevenson Dajalos kinsa parehong mibahug og 27 puntos, midaog batok sa Better Run Basketball Association (BRBA), 115-107 samtang sa ikaduhang duwa, gipalagpot sa MIBA ang contender apan undermanned ang Los Amigos Basketball Association (LABA), 77-70.
Ang BRBA ug LABA maoy mag-ilog alang sa ikatulong pwesto sunod Sabado, Marso 6 sa usa ka knockout game samtang ang Power Forty ug ang MIBA kinsa parehong naghupot og twice-to-beat advantage, mag-abot sab alang sa best-of-three championship series.
Si Cesar Ortega kinsa wala kapugngi sa ilawom, miamot og 20 puntos alang sa Power Forty ug si Allan dela Rama midugang og 14 puntos. Ang Power Forty maoy gi-ilang team to beat ug pre-tournament title favorite.
Sila si Rap Abadejos ug Dodong Espinosa maoy nangu sa BRBA sa ilang 26 ug 25 points matag usa samtang si Pacito Campos miposa og 20 puntos.
Sa laing bahin, sila si Titing dela Torre ug Edgar Rivera parehong mipuntos og 19 aron pangulohan ang MIBA samtang sila si Romy Vasquez ug Monching Cadiz miamot sab og 15 ug 14 puntos, matag usa.
Ang LABA pakyas sa pag-inat unta sa serye batok sa MIBA tungod kay wala moduwa ang abtik nga point guard nga si Pablo Yu ug ang high-scoring power forward nga si Dodoy Rizane ug si Ansing Companion maoy nangu sa ilang opensa pinaagi sa iyang 22 puntos og si Marlon Pangan midugang og 16 puntos.
Sila si Rey Lopez ug Nestor Patindol miamot sab og double figures— 13 kang Lopez ug 10 puntos kang Patindol.
Puntos matag usa:
First Game:
Power Forty (115)— Arias 27, Dajalos 27, Oretga 20, Dela Rama 14, Yosores 8, Bughao 6, Vernaiz 5, Gacayan 4, Gajudo 4
BRBA (107)— Abadejos 26, Espinosa 25, Campos 20, Lopez 9, Albaño 8, Abellana 6, Ledesma 5, Ocañada 4, Mosqueda 4
Second Game:
MIBA (77)— Dela Torre 19, Rivera 19, Vasquez 15, Cadiz 14, Cañada 4, Mejias 2, Medalle 2, Cabranilla 2
LABA (70)— Companion 22, Pangan 16, Lopez 13, Patindol 10, Colina 5, Seno 4. - Gabby G. Malagar (BANAT NEWS)