Ornopia misidlak sa Lanao del Norte

CEBU, Philippines - Keiz BJ Racing Team big boss Siegfred Ornopia midaog og titulo ug runner-up trophy sa 3rd leg sa Sel-J Sports Inc. Philippine Motocross Championships niadtong Pebrero 20-21, 2010 didto sa Tubod, Lanao del Norte.

Si Ornopia, ang tag-iya sa Keiz BJ Motors, mipukan ni Hermes Bantoc aron paghari sa Executive A ning duha ka adlaw nga kompetisyon nga gipaluyohan sab ni Gov. Khalid Dimaporo.

Hinuon, si Ornopia pakyas pagkulit og double victory dihang napunta siya sa ikaduha sa Executive B nga gidominar ni Dexter Bacabas. Si Roman Laurente mi-okupar sa ikatulo nga dapit.

Ang mga anak ni Ornopia nga sila si Earl Jean Brylle ug Ken Kerry parehong mipahiluna sa ikaduhang dapit sa tagsa-tagsa nila ka kategoriya.

Si Brylle miangkon sa 1st runner-up trophy sa 65 cc. class, samtang si Ken-Ken sa 50 cc. division.

Human sa Lanao del Norte, si Siegfred ug iyang mga anak nangandam na sab alang sa Cawayan Invitational Motocross 2010 nga gikatakda karong Marso 12 didto sa Masbate.

Gipasiugdahan ni Cawayan, Masbate Mayor Edgar Condor, ang lumba gipaluyohan sab sa Cawayan Business Club. – BANAT NEWS