CEBU, Philippines - Laing sinukliay sa kumo ang masaksihan sa mga molupyo sa Bayawan, Negros Oriental nga ulohan og “Bakbakan sa Bayawan” karong Marso 7 didto sa Bayawan City Sports Complex.
Giatngan sa maong boxing card mao ang duha ka title fights tali ni Cebu-based Thai fighter Jesus Singwangcha ug ni Jovie Merca sa Butuan alang sa Philippine Boxing Federation super featherweight title.
Ang taga-Negros Oriental nga si Jayson Singwangcha makigbinukbukay usab batok ni Gedion Amba sa Wakee Salud Stable alang sa Philippine super bantamweight belt.
Moaway usab sa undercard ang taga-Mandaue nga sila si Jayson Geda ug Jerome Bontog. Si Geda makigharong ni Jestoni Pepito sa Masbate, samtang si Bontog makigsangka ni Marco Demecillo sa Iligan.
Mokompleto sa mga away mao sila si Jayson Inso batok ni Garry Macalam, Chaiyo Singwangcha batok Christian Saga ug Renjie Sabanal batok Junrey Sta. Ana.
Ang maong boxing event gipasiugdahan sa hiniusang puwersa sa Sugbuanong boxing promoter Rex 'Wakee' Salud ug Thai promoter Naris Singwangcha. – BANAT NEWS