CEBU, Philippines - Mikabkab og laing upat ka bulawan ang Central Visayas kortesiya sa karatedo ug lawn tennis sa Commission on Higher Education (CHED) 2010 National Games kagahapon didto sa Rizal Memorial Sports Complex.
Sila si Kennex Abadia, Israel Abarquez ug Amiel Ayaay sa University of San Jose-Recoletos (USJ-R) ug Lowell Lloyd Cañete sa University of San Carlos (USC) maoy mitimon sa Central Visayas paghakot og bulawan sa men's lawn tennis event human gipilde ang Region XII.
Sa pikas bahin, ang mga pambato sa Central Visayas nga sila si Sallydine Siso, Lovely Soquiño, Jeneveb Petecio ug Julie-an Jopia igo lang mihipos og bronze.
Sa laing bahin, si Ann Marie de la Riarte, nahimong labing unang triple gold medalist sa Central Visayas human manghawod sa women's 50-kgs. individual kata competition kagahapon.
Sa swimming, ang Central Visayas mihakot og usa ka silver kortesiya ni Claudine Candia sa USC sa women's 100m butterfly ug tulo ka bronzes, duha gikan nilang Paula Vega sa University of Cebu (UC) pinaagi sa 800m freestyle ug 100m freestyle. – BANAT NEWS