Ave Maria-Aerosol magtakos karon

CEBU, Philippines - Tinguha karon sa Ave Maria Sanctuary Park-USJR Jaguars nga mokulit sa ilang sagunson nga ika-upat nga kadaogan apan dili nila angayan ipadaplin sa hingpit ang katakos sa kugihan nga Aerosol-USPF Panthers sa bugtong collegiate match atol sa pagpadayon sa CESAFI Partner’s Cup didto sa Cebu Coliseum.

Mga duwa karon: (Cebu Coliseum)

2:30 pm Bibbo/CIT vs. Ave Maria-USJR (Jrs.)

4 pm PTT-UV vs. Aersol-USPF (Jrs.)

5:30 pm Ave Maria-USJR vs. Aerosol-USPF (Srs.)

Sa unang duwa karong hapon, ang Bibbo-CIT Wildkittens mobanhaw na sab sa ilang rivalry batok sa Ave Maria-USJR Baby Jaguars kinsa mag-abot sa labing unang higayon human masakmit sa Wildkittens ang korona sa CESAFI batok sa Baby Jaguars sa milabay’ng Oktubre sa miaging tuig.

Sa laing duwa sa high school, ang PTT Fuels-UV Baby Lancers makigsangka batok sa Aerosol-USPF Baby Panthers diin parehong tinguha sa matag kampo ang pagdaog karong adlawa human sila mapakyas batok sa tagsa-tagsa ka kaatbang sa miaging semana.

Ang 3-0 Jaguars mosandig sa ilang opensa kanilang Armand Poce, Jabe Delfino ug Manny Gabas nga usa ka commercial veteran aron makigkumboya nilang Kurt Amores ug topgunner Edwin Bibera.

Apan hayan dili sab pabentaha ang Panthers kinsa mihatag og kalisdanan ngadto sa San Marino Corned Tuna—USC Warrior nga igo lang naka-ipsot og dos puntos batok kanila.

Kung mao gihapong matanga sa duwa ang ipakita sa Panthers nga mogamit sa ilang gikusgon ug kapaspason, posibleng maglisod sab ang Jaguars pagdaog.

Tungod kay mas gagmay ang Panthers kinsa naghupot og 1-1 nga baraha, mangita’g paagi nga mosaler ang ilang gikusgon unsaon pagsumpo sa Jaguars aron maangkon ang dungog isip maoy unang team nga mopakurat sa wala pay pildeng Jaguars.

Ang Panthers pangulohan nilang Elvis Labares, Arletroy Mercader, Dennis Ferraren ug Dennis Tabada aron mo-abag kanilang Elwin Durano, Fritz Dajalos ug Ellison Rivera, pipila lang sa ilang mga pambato. - Gabby G. Malagar (BANAT NEWS)