Igimax modepensa karon sa iyang titulo

Gumikan sa daghang mga tabang nga miabot sa iyang kinabuhi, ang masaarong Cebuano cyclist nga si Luis Miguel 'Igi' Maximo tinguha na sab nga mohakot og daog sa Philippine Premiere Cycling League's second round karong adlawa didto sa Nuvali sa Sta. Rosa.

Si Maximo modepensa sa iyang junior division title nga iyang nakuha human maghari sa first round nga didto gipahigayon sa Macapagal Avenue sa Pasay City.

Ang football player sa Paref-Springdale ug nagseklista na karon, mowadwad sa maong lumba dili tungod kay iyang ipamatuod nga dili tsamba ang iyang kadaugan sa round 1, kun dili tungod kay magsul-ot sab kini og bag-ong cycling outfit kortesiya ni Zandro Fajardo sa OZ Racing.

Si Fajardo, kanhi motocrosser ug nahimong negosyante, nakakita sa potensiyal ni Igimax, nga maoy tawag karon niya sa Cebu cycling community atol sa round 1.

Si Fajardo, nakigsabot-sabot sa amahan ni Igimax nga si Jonathan Maximo ug mitanyag og suporta ngadto sa batan-ong seklista.

Mipaluyo sab si Fajardo og cycling apparel ni RP standout mountainbiker Niño Surban.

Gawas nga modepensa sa iyang titulo, si Igimax mosikad sab isip guest rider sa Liquigas Junior Cycling Team, ang developmental squad sa nabantog na kaayo sa tibuok kalibotan nga Liquigas company dinhi sa nasud.