CEBU, Philippines - Nasakmit sa USC-Red Team nga gipangulohan ni ex-PBA Peter Naron ang ikatulong puwesto human nila gipilde ang BIR team ni skipper Yoli Meso, 91-80 sa overtime sa USC-South Campus PTCA, Inc. basketball tournament didto sa South Campus covered court sa dalan J. Alcantara, ning dakbayan.
Naglabaw unta ang BIR og 15 puntos sa first half, 43-28 pinaagi sa nagpungasi nga tirada nilang ex-SWU Cobra Jessie Lumantas kinsa nakigkumboya nilang Leo Galvez ug Cris Diamos alang sa usa ka mainitong rally.
Ang USC-Red lubong og 10 puntos sa sayong bahin sa final period, 46-56, apan kalit nga nagmangtas sila si Kadong Paca, Gino Almencion ug Naron nga mohimo'g 26-16 nga rally hangtod nga nakatabla, 72-all hinungdan sa overtime.
Sa dugang singko minutos, USC-Red wala na magpapugong ug mipatuasik kini sa ilang nag-aso-aso nga rally aron pagposte og 11 puntos nga kadaugan.
Si Paca maoy nangu sa USC-Red sa iyang 24 puntos, samtang si Naron midugang og 19 puntos.
Ang BIR gipangulohan ni Lumantas kinsa mibahog sab og 24 puntos.
Puntos Matag Usa
USC-Red (91) - Paca 24, Naron 19, Almencion 17, Camacho 13, Alensa 10, Lazaga 4, Cabajar 2, Rocamora 2
BIR (80) - Lumantas 24, Galvez 14, Diamos 12, Alburo 8, Del rosario 6, Limbaroc 6, Meso 4, Rodriguez 4, Victor 2. – BANAT NEWS