Itom Yuta nag-una sa North

CEBU, Philippines - Mirehistro sa ikaupat nilang sunod-sunod nga kadaugan ang Itom Yuta ug ning higayona ilang gibiktima ang Lorega Proper B, 84-80 sa SK-FDH basketball tournament diha sa Mayor’s Barangay Satellite Complex sa Brgy. Lorega San Miguel, ning siyudad.

Gawas sa ilang lig-on nga line-up, nakadugang usab sa pabor sa Itom Yuta mao ang kakulang sa players sa Lorega B.

Ang kombinasyon nila ni Jeffrey Paler ug Pastor Amorado maoy mituboy sa Itom Yuta, kinsa milabaw og singko puntos sa nahabiling 3:02 sa third period, 74-69. Mi-rally ang Lorega B aron laslasan ang labaw ngadto na lang sa tres puntos, 82-79 sa katapusang minuto sa duwa, apan didto ra kutob ang ilang maayong nahimo kay nahutdan kini sa oras.

Si Amorado maoy nangulo sa Itom Yuta pinaagi sa iyang 17 puntos, samtang si Paler miposa og 16 ug si Raymund Villaflor miamot og 14 puntos.

Ang pilderong Lorega B gipangulohan ni Noel Ravanes, kinsa miburak og 20 puntos, si Bing Zabate mikabkab og 18 puntos ug si Rex Mabaga mitampo og 17 puntos.

Sa laing duwa, mikulit sab og daog ang Camansi pinaagi sa pagpaluhod sa San Roque sa iskor nga 103-98.

Si Rogelio Batac mimarka sa iyang career-high 30 puntos aron pangulohan ang Camansi. – BANAT NEWS