CitiRun gilusad

CEBU, Philippines - Agi’g pagsaulog sa ikaupat nilang anibersariyo, ang Citigym mopasiugda sa labing una nilang CitiRun karong Marso 28 diha sa Lagoon sa Waterfront Hotel and Casino sa barangay Lahug, ning siyudad.

Ang lumba adunay duha ka dibisyon -- Open ug Citigym clients ug kini tulo ka race lengths nga pilian -- 12K, 6K ug 4K runs. 

Si race director Joel Baring, nakahukom nga himuong 12K ang lumba aron madugangan ang kompetisyon tali sa mga tang-ang runners nga mosalmot sama nila ni Mary Grace Delos Santos ug Mendel Lopez, kinsa personal nga mitambong sa press conference kagahapon didto sa Uno Restaurant sa Waterfront Hotel.

Gawas sa mga top runners, mipadayag usab sa ilang partisipasyon si RP Iron Man king Noy Jopson, ABS-CBN TV News anchor Atty. Haidee Acuña ug Lahug Brgy. Capt. Mary Ann Delos Santos.

Sa iyang bahin, si Anne Manubag, ang Program and Fitness Director sa Citigym mipahibalo nga gawas sa mga medalya, ang top 10 finishers sa open 12K ug 6K makadawat sab og ganting salapi .

Ang registration fee nagkantidad og P200, apan kun magparehistro og sayo sugod karong adlawa hangtod sa Pebrero 28 mobayad lang og P150, libre na ang singlet. 

Ang registration forms makuha sa Philippine Sports Commission-VII office sa Cebu City Sports Center, Lahug Barangay Hall, Toby's sa SM, RUNNR sa Ayala ug Citigym sa Waterfront Hotel. – BANAT NEWS