Upat ka teams magtigi sa Cebu Slow Pitch Softball Tournament

CEBU, Philippines - Sugdan og sayo ang second edition sa Cebu Slow Pitch Softball Tournament Series himuon karong Domingo diha sa Aboitiz Sports Field sa Mandaue City.

Ang kalampusan sa unang edisyon nga nakakabig og daghang mga partisipante, maoy naghatag og dalan alang sa pagpahigayon niini karong Domingo inay unya pa himuon sa summer.

Upat ka teams ang mag-ilog sa titulo -- ang host Team Fastball, Richard Sharpe's Jokers Arms nga gibitoonan sa American, Canadian ug Europan players, Bandidos nga gimaneho sa mga batan-ong magpapatigayon ug executives nga pangulohan ni Marko Sarmiento ug ang Rebels, ang local team sa kanhi baseball players.

Ang teams moduwa og double-elimination format diin ang team nga mapilde og kaduha mataktak na sa torneyo.

Ang unang duwa gitakdang sugdan sa alas-8:30 sa buntag.

Ang maong kalihukan agi'g pagpangandam alang sa mas daku nga torneyo, matud pa ni Jesse Bernad, ang tag-iya ug general manager sa Fastball.

Ang dakung kompetisyon mao ang Fastball Summer Softball League 2010 karong Abril 18 hangtod sa Mayo 30. – BANAT NEWS