CEBU, Philippines - Nakuha sa Lawis ang numero unong dapit sa standing sa North Division human nila gipilde ang San Miguel-B, 124-100 sa SK-FDH hoopfest diha sa Mayor’s Barangay Satellite Complex sa Brgy. Lorega San Miguel, ning siyudad.
Ang sinaligan sa Lawis nga si Bryan Ruelan mao na sab ang nangulo sa kadaugan pinaagi sa paglansang og 24 puntos.
Unang miratsada ang San Miguel-B ug miposte pa kini og 14 puntos nga labaw paghuman sa first period, 36-22 sa pagpangulo ni Francis Rafols. Apan ang Lawis sa pagpaningkamot ni Ruelan nakarekober ug ilang nailog ang momentum sa halftime, 53-47. Gikan niadto hinay-hinay na nga giinat ang ilang labaw hangtod nga naangkon nila ang kadaugan.
Misuporta sab sila si Joseph Bayloses ug Mark Cuizon nga nagkumboya og 30 puntos.
Ang pilderong San Miguel-B gipangulohan ni Rafols pinaagi sa iyang 31 puntos, gisundan ni Mark Cueva nga adunay 21 puntos ug Ronald Codizar sa iyang 18 puntos.
Sa laing duwa, ang Lorega Proper-A naka-eskapo batok sa Sereas sa iskor nga 77-75 alang sa ikatulo nilang daog.
Si Nyuri Nadalo nga maoy bayani sa Lorega miposte og 27 puntos, samtang si Marlon Dela Cruz miamot og 11 puntos.
Si Ricky Garcia mibugha og 17 puntos aron pangulohan ang Sereas. Si Remedio Lambo mitampo og 16 puntos ug si Emeritus Amacna mitunol og 14 puntos.
Puntos Matag Usa
Unang duwa:
LAWIS (124) - Ruelan 24, Bayloses 17, Cuizon 13, Bacus 10, Carreon 8, Hassamal 8, Liboncogon 4, Calma 6, Bantiles 11, Cinco 9, Mabaga 2
San Miguel-B (100) - Rafols 31, Cueva 21, Codizar 18, Baque 4, Asentista 2, Loreto 2, Cuevas 4.
Ikaduhang duwa:
Lorega Proper-A (77) - Nudalo 27, Dela Cruz 11, Tariao 14, Joya 4, Geniston 2, Fuentes 4, Perales 4, Rusia 2.
Sereas (75) - Garcia 17, Lambo 16, Amacna 14, Apa 7, Emnas 6, Ariola 2, Esperanza 5. – BANAT NEWS