Niños milubong sa Ave Maria

CEBU, Philippines - Ang M. Lhuillier Kwarta Padala-Cebu Niños walay kukaluoy nga milubong sa Ave Maria Sanctuary Park, 111-83, sa pre-season games sa Smart Liga Pilipinas Conference 4 kagabii diha sa Cebu Coliseum.

Sa ilang 2-0 nga baraha, ang Niños ni team owner Michel J. Lhuillier ug multi-titled coach Raul 'Yayoy' Alcoseba, segurado makasulod sa finals ug makigsangka kini sa kampiyonato ugma batok sa nidaog sa duwa kagabii tali sa GenSan Pacman MP Warriors ug sa Trace-Laguna Stallions.

Human sa ilang kadaugan sa pre-season opener batok sa Trace Laguna Stallions, 68-61, gipadayon sa Niños ang dominante nilang performance ning higayuna batok sa torotoy nga Ave Maria.

Sukad miposte og 29-18 sa first quarter, ang Niños midabodabo sa Ave Maria aron pagkawot og 27 puntos nga labaw, 70-43 human sa triple ni Stephen Padilla sa katapusang 5:45 sa third period.

Ang buzzer-beating triple ni Eliud Poligrates maoy mikandado sa kadaugan.

Si Padilla maoy topscorer sa Niños sa iyang 18 puntos, pulos gikan sa 3-point area, gisundan ni Abby Santos sa iyang 13 puntos, samtang si Mark Ababon miamot og 10 puntos.

Ang gilubong nga Ave Maria gipangulohan ni Ronald Bucao sa iyang 13 puntos, samtang sila si Jabe Delfino ug Bobby Hatague miamot og 11 puntos matag usa.

PUNTOS MATAG USA

CEBU (111) - Padilla 18, Saladaga 13, Santos 13, Ababon 10, Nailon 10, Cruz 9, Dacia 9, Poligrates 7, Mario Basco 7, Dacia 6, Marlon Basco 6, Magsumbol 6, Saladaga 4, Mondragon 2

AVE MARIA (83) - Bucao 13, Hatague 11, Delfino 11, Aying 9, Luga 8, Senining 6, Amores 6, Ponce 6, Cavan 4, Malinao 4, Gabas 2    (BANATNEWS)