28th PBL season di-dribol ngayon
MANILA, Philippines - Matapos ang ilang alinlangan sa kanilang pagbubukas ng pang 28th season, pormal na bubuksan ngayon ng Philippine Basketball League (PBL) ang 2010 PG Flex–Erase Placenta Cup sa The Arena sa San Juan.
Nakatakdang sagupain ng Ascof Lagundi ang Excel Roof ngayong alas-2 ng hapon kasunod ang banggaan ng Fern-C at Cossack Blue sa alas-4.
Kumpiyansa si PBL Commissioner Chino Trinidad na muling pupukaw ng atensyon ng mga basketball fans ang mga collegiate players na maglalaro sa walong koponan.
“There are a lot of exciting players out there, even rookies are expected to make an impression in the coming tournament,” wika ni Trinidad.
Kabilang sa mga collegiate superstars ay sina Paul Lee, Jai Reyes at Eric Salamat ng Cobra Energy Drink, John Wilson ng Fern-C at Jimbo Aquino at Calvin Abueva ng Excel Roof.
Sina Aquino at Abueva ang siyang ibabandera ng Excel Roof ni Ato Agustin kontra kina JR Gerilla, Raymond Aguilar, Marc Canlas, Sean Co, Fritz Bauzon, James Mangahas at Bam Gamalinda.
Nakuha rin ng Ascof Lagundi si Edwin Asoro, miyembro ng Harbour Centre at Oracle Residences na tumalo sa Cobra sa nakaraang championship series ng PBL PG Flex.
Sa ikalawang laro, ipaparada ng Fern-C sina Wilson Hans Thiele, Allan Evangelista at Anthony Espiritu bukod pa kay dating Ginebra pointguard Bal David bilang head coach.
Itatapat naman ng Cossack Blue sina Raffy Reyes, Paul Zamar at iba pang Red Warriors ng University of the East, yumukod sa back-to-back champions Ateneo De Manila University Blue Eagles sa nakaraang 72nd UAAP championship series.
Si San Juan Mayor JV Ejercito ang siyang maghahagis ng ceremonial toss bago ang naturang dalawang laro. (RC)
- Latest
- Trending
