Koponang kulelat puwede pa sa finals

MANILA, Philippines - Maski ang isang koponang nasa ilalim ay may pagkaka­taon pang makahirit ng isang fi­nals berth.

Sa format ng 2010 PBL PG Flex-Erase Placenta Cup, ha­hatiin sa dalawang grupo ang wa­long koponan para sa unang classification round kung saan ang top two sa magkabilang pangkat ay mapupunta sa Class A at ang bottom two ang mahuhulog sa Class B.

Sa pagdadala sa kanilang win-loss record sa ikalawang classification phase, ang top two teams sa Class A ay aabante sa semifinal round bitbit ang ‘twice-to-beat’ advantage.

Ang bottom two teams naman sa Class A ang haharap sa top two teams sa Class B sa knockout quarterfinals kung saan ang mananalo ay papasok sa semis.

Ang mga mananalo sa semis ang magkikita para sa best-of-three finals series.

Ang 2010 PBL PG Flex-Erase Placenta Cup na magbubukas sa Martes sa The Arena sa San Juan, ayon kay PBL Commissioner Chino Tri­nidad, ay magiging maikling tor­neo.

“We have more than 50 rookies and another 50 plus veterans, all of them are out to make a name for themselves,” ani Trinidad. “That’s the reason why the PBL continues to exist, we have to help these budding stars fulfill their dreams of pla­ying in the pro league.”

Ang mga koponang makikita sa aksyon ay ang Cobra Ener­gy Drink, Ascof Lagundi (da­ting Pharex), Fern-C, Excel Roof, Pharex B, Cossack Blue, AddMix at Ani-FCA.

Ang Pharex-B ay kinabi­bi­langan ng mga Fighting Ma­roons ng University of the Philipines, habang itatampok naman ng Fern-C si da­ting Gi­nebra pointguard Bal David bilang head coach.

Kabilang sa mga inaasa­hang gagawa ng eksena ay sina Paul Lee, Jai Reyes at Eric Salamat ng Cossack Blue, Jimbo Aquino ng Excel Roof, John Wilson ng Fern-C at Gio Ciriacruz ng Add­Mix. (Russell Cadayona)