Krusyal na Game 3 hihiritin ng Aces

MANILA, Philippines - Alam ni coach Tim Cone ang kasaysayan ng Alaska pagdating sa mga semifinals at championship series.

Sa nakaraang PBA Fiesta Conference Finals, inangkin ng Aces ang ma­laking 2-0 abante bago matalo ng nagharing Talk ‘N Text Tropang Texters sa sumunod na apat na laro.

Kinuha rin ng Alaska ang 3-1 lamang sa semifinals series ng 2005-2006 All-Filipino Cup hanggang makabangon ang Purefoods at kunin ang huling tatlong laban.

 “Nothing is safe with me,” wika ni Cone. “I’ve lost in a series even when leading 2-0 or 3-1. Even on my tennis game, I was so good on leading a game, but was having a hard time closing out the match.”

Mula sa kanilang 2-0 lamang sa Barangay Ginebra, pipilitin ng Alaska na makalapit sa isa sa dalawang upuan sa championship series ng 2009-2010 PBA Philippine Cup.

Magtatapat ang Aces at ang Gin Kings ngayong alas-4 ng hapon kasunod ang salpukan ng Giants at San Miguel Beermen sa alas-6:30 ng gabi sa Game Three ng kani-kanilang se­mifinals wars sa Araneta Co­liseum.

Sinikwat ng Alaska ang Game One, 104-79, at Game Two, 90-82, kontra Ginebra para itala ang 2-0 abante sa kanilang best-of-seven semifinals showdown.

Alam ni Cone ang kakayahan ng Gin Kings ni Jong Uichico.

“In Talk N Text’s last se­ries against Ginebra, Talk ‘N Text was up, 2-0, and lost the series,” sabi ni Cone. “We’ll have to come out Sunday (Game 3) with a firm understanding that it will be really hard to beat Ginebra.”

Matapos magposte ng average na 23 puntos kada laro sa quarterfinals, tumipa lamang si JC Intal ng pito at dalawang puntos sa Games One at Two sa se­mifinals.

“There’s no excuse for us. We have to fight,” ani Uichico. “If we lose at least we lose fighting and if we win, we won because we fought for it.”

Bumawi naman ang Purefoods mula sa kani­lang 83-99 pagkatalo sa Game One para angkinin ang 103-84 tagumpay sa Game Two at itabla sa 1-1 ang kanilang semis showdown ng San Miguel.

“We have to win three more games. We just cut the series into a best-of-five. There’s nothing special with this win,” sabi ni mentor Ryan Gregorio sa kanyang Giants. (Russell Cadayona)