CEBU, Philippines - Ang ikaduhang luna maoy ilogan sa San Marino Corned Tuna-USC Warriors ug sa Enervon C-UC Webmasters sa dihang mag-abot kini karong gabii sa main game sa 4th CESAFI Partner’s Cup diha sa Cebu Coliseum.
Sa laing collegiate match, ang Lion Tiger-USPF Panthers makigsangka batok sa Prime Asia-DBTC Greywolves sa duwa sa mga pilderong koponan.
Ang solo leader Enervon C-UC Junior Webmasters tinguha sab nga lugwayan ang ilang daog ngadto sa 4-0 dihang ilang sangkaon ang 1-2 San Marino-USC Baby Warriors.
Ang Warriors ug ang Webmasters parehong napilde sa solo leader Ave Maria-USJR Jaguars ug ang modaog tali nilang duha karong gabii mag-solo sa ikaduhang puwesto.
Ang Warriors maoy labing kuyaw nga teams karon tungod kay maayo kaayo ang ilang pulso gikan sa three-point territory ug maayo sab silang mobasa og depensa.
Si Giovanni Padillo maoy labing epektibo, samtang sila si Jabe Bautista, Michael Cantona, Sam Hermosa ug Joven Cid Cortes nagkaumento sab ang duwa.
Sa laing bahin, ang third unit sa Webmasters maoy labing kuyaw tungod kay naglakip kini ni 6-foot-9 June Mar Fajardo uban kang Moncrief Rogado, Edward Pao, Kevin Quilantang ug Kelvin Juliane.
Ang 3-0 nga Junior Webmasters maoy paborito batok sa 1-2 Baby Warriors. Pipila sa ilang mga sinaligan naglakip nila ni Alvin Labolabo Jr., John Raphael Aranas, Clint Saramosing, Alfred Codilla, Jerei Marion Pingoy ug Alexander Nazareno. – BANAT NEWS