CEBU, Philippines - Anaa karon sa Sugbo si Customs Commissioner Napoleon Morales aron mohatag og mensahe atol sa pagbukas sa Bureau of Customs (BOC) 1st Port of Cebu Sportsfest 2010 karong adlawa diha sa Mandaue City Cultural and Sports Complex.
Si Morales mao sab ang mohatag sa premyo sa modaog sa Miss BOC Port of Cebu ug sa best in uniform.
Si District Collector Atty. Ronnie Silvestre moduwa sa basketball ug golf. Lain pang mga events nga tigian mao ang bowling, volleyball, badminton, tennis ug chess.
Ang basketball event pagaduwaon sa duha ka binyu -- Mandaue Sports Complex ug sa Vicente Sotto Memorial Gym sa Punta Princesa, ang bowling adto sa SM Bowling Lanes, ang tennis sa Baseline tennis courts, ang volleyball ug badminton adto sa Port Side duol sa buhatan sa Customs, ang chess adto sa BOC conference room ug ang golf adto sa Mactan Air base golf club.
Matud ni Silvestre, nga iyang gipaluyohan kining maong sportsfest tungod kay usa kini ka paagi nga maka-ehersisyo ang mga empleyado sa Customs ug ingon man ang camaraderie.
Sa laing bahin, ang Hotmen ubos ni Collector Bingo Matugas makigsangka batok sa Assessment Division sa bugtong duwa sa basketbol.
Ang Hotmen gilantaw nga maoy labing lig-on nga contender alang sa korona. Apan matud ni Matugas nga wala sila ma-pressure tungod kay dili pagdaog sa korona ang ilang tuyo kun dili ang paglingaw-lingaw.
Mga sinaligan sa Hotmen ni coach Romy Cal mao sila si Jumie Ararao, King Amores, Marvin Sillar, Ronnie Ruiz, Ronnie Clapano ug ang ex-UC skipper Kenneth Kernn Sesante.
Samtang ang mga pambato sa Assessment ni coach Rady Abarintos naglakip nilang Dondon Cadungog, Bikeng Rollon, Daniel Enriquez, Tata Laborte ug Noel Medalle. – BANAT NEWS