Cebu City pabiling nag-una sa 2010 CVIRAA Meet

CEBU, Philippines - Pabiling nag-una ang perennial champion Cebu City Niños sa ikaduhang adlaw sa kompetisyon sa 2010 Central Visayas Regional Athletic Association (CVIRAA) Meet kagahapon didto sa Ramon Durano Sr. Memorial Sports Complex.

Ang Cebu City nakatigom na og 15 ka golds, siyam ka silvers ug 10 ka bronzes sa secondary division ug 13-12-8 medal tally sa elementary level sa kinatibuk-ang 28-gold, 21- silver ug 18-bronze medals.

Ang Dumaguete temporaryong nahimutang sa ikaduha sa overall uban ang 20 golds, 19 silvers ug 13 bronzes, samtang ang Cebu Province nalandig gihapon sa ikatulo sa ilang 11 golds, 14 silvers ug 15 bronzes.

Kagahapon, ang Cebu City igo lang mikabkab og usa ka bulawan sa athletics kortesiya ni Jesreil Cabatino sa secondary boys high jump sa distansya nga 1.73m, samtang ang Cebu Province miukay og lima ka golds sa track oval.

Sa swimming, diha sa Cebu City Sports Center, ang Cebu City padayon mihakot og bulawan uban nilang Anthon Linn Navarro ug Loren Dale Echavez nga nagkumboya og siyam ka golds.

Giharos ni Navarro ang tanan niyang misyon sa individual aron hakuton ang lima ka golds sa elementary division.

Si Navarro mikubkob og laing tulo ka bulawan kagahapon pinaagi sa 50m backstroke sa oras nga 34:96, 200m freestyle sa oras nga 2:28.31 ug sa 100m backstroke sa oras nga 1:16.95.

Sa iyang bahin, si Echavez mihakot sab laing tulo ka golds gikan sa 200m freestyle sa oras nga 2:17.36, 100m butterfly sa oras nga 1:09.27 ug sa 800m freestyle sa oras nga 10:38.46.

Sa kinatibuk-an, ang Cebu City adunay 16 golds, 13 silvers ug walo ka bronzes sa swimming events.

Sa laing duwa, ang Cebu City mipukan sa Toledo sa sipa sud sa straight sets ug ila sab gipilde ang Tagbilaran sa sepak takraw. – BANAT NEWS