Enriquez hari sa Bogo Open Chessfest

CEBU, Philippines - Wala magpalupig si NM Rogelio Enriquez Jr. batok sa mga lig-ong kaatbang aron paghari sa Bogo Open Chess Tournament niadtong weekend.

Si Enriquez ug Voltaire Sevillano nagtabla sa managsamang 6.5 puntos human sa 7-round Swiss system competition, apan si Enriquez maoy milangkat sa titulo pinaagi sa superior tie-break output nga 33.5 puntos subay sa Bucholz system.

Si Sevillano nakakuha lang og 32.0 puntos.

Si IM Kim Steven Yap ug Dennis Navales pareho sab mitapos og managsamang 5.5 puntos, apan si Yap ang nidaog sa ikatulong dapit pinaagi gihapon sa tie-breaker.

Mikompleto sa top eight finishers mao sila si Rommil Asoque, Erwin Ababat, Bonn Tibod ug Kyle Sevillano nga parehong mirehistro og 5.0 puntos.

Sila si Lito Manigsaca ug Patricio Tonacao maoy midaog isip top scorers gikan sa Bogo sa seniors division uban ang 4.5 puntos, samtang sila si Jasper Doldolea ug Ian Hilot mao sab ang midaog sa kiddies category.

Gipasiugdahan ni Joe Muñez, ang usa ka adlaw nga kompetisyon gipaluyohan ni Cebu Fourth District Rep. Tining Martinez ug Bogo City Mayor Celestino 'Junnie' E. Martinez, Jr. – BANAT NEWS