1st Port of Cebu SPORTSFEST 2010

CEBU, Philippines - Subsob karon ang pagpangandam sa mga atleta nga nagtrabaho diha sa lokal nga buhatan sa Bureau of Customs atol unya sa pagbukas sa ilang torneyo ang 1st Bureau of Customs 1st Port of Cebu Sportsfest diin adunay labing menos pito ka events ang pagahimoon sugod karong Pebrero 12 diha sa Mandaue City Sports and Cultural Complex.

Dili masukod ang kalipay sa mga empleyado sa Customs ingon man usab ang mga brokers ug ilang mga personeros dihang mihatag sa iyang kinatibuk-ang suporta ang bag-ong District Collector nga si Atty. Ronnie C. Silvestre, usa ka Pampangeño nga lupig pa ang Cebuano og batasan ug sa pagka-mahigalaon. Daan na siyang mahiligon sa basketball sa elementary ug high school pa siya didto sa Don Bosco-Pampanga apan wala siya mahatagi og higayon nga mahimong varsity player sa college.

Sa miaging tuig, may gipahigayon nga torneyo sa basketball ang Customs diin maoy nahimong kampiyon ang Mactan Hotmen ni Collector Bingo Matugas ug didto gipahigayon ang victory party sa Rama compound sa Basak-San Nicolas sa panimalay nilang Bise-Mayor Mike Rama ug Customs Police Jingjing Rama ug kaadlawon na nag-ukang ang hudyaka aron saulogon ang kampiyonato.

Sa miaging pipila ka tuig, aduna gyu'y ipahigayon nga kalihokan sa sports ang Customs—usahay basketball ug usahay sab bowling. Sa labing unang higayon ubos ni Collector Silvestre, nahimong pito ka events ang kumpetisyon lakip na ang basketball, volleyball, bowling, badminton, billiards, chess ug golf. Misugyot sab si Collector Silvestre nga ikalip ang darts ug iyang dapiton ang mga darters gikan sa media isip guest team. “Maganda ang darts kasi habang tumitira ka, puede rin tumotoma,” matod pa sa ni Collector Silvestre.

Kataposang adunay dakung kalihokan sa sports ang Customs dinhi sa Sugbo niadto pang panahon ni Collector Rolando Yebes nga karon maoy gobernador sa Zamboanga del Norte. Wala kaayo sila makasikad og maayo atol sa panahon nilang Collector Lourdes Manaoang ug Collector Ricardo Belmote kinsa maoy gipulihan ni Collector Silvestre.

Karon nga mibalik na kining ilang dakung torneyo, ang tanang teams gustong mosumpo sa Hotmen ug nag-iyahay lang usab sila pagpalig-on tungod kay usa na lang ka division ang basketball nga pagalangkuban gyud sa mga magduduwa gikan sa Customs ug kadtong mga maayong laki nga dili empleyado sa Customs ug dili sab personeros sa mga brokers, mahimong moduwa isip imports .

Sa miaging panahon, kanunay bahigon sa duha ka division ang ilang basketball tournament—adunay 35 years old below division ug duna sa’y 35 years above division.

Ang Collector’s Office ubos ni Collector Silvestre diin apil siya sa moduwa, dili magpalig-on tungod kay matod pa niya dili kay ang pagdaug o mahimong kampiyon ang iyang team maoy iyang tumong kung dili aron siya maka-exercise.

"It’s not how you win or lose but how you play the game," matod pa niya.

Dinhi sab makita ang tinuoray nga spirit of sportsmanship. Laing tumong niining ilang sportsfest mao ang physical fitness ug pagpalambo sa camaraderie sa tanang mga empleyado sa Customs.

Wala maglisod og kumbensir ang organizers nga sila si Customs Police Rico Mongaya ug Assessment Division Chief Rady Abarintos pagkumbensir kang Collector Silvestre sa pagpahigayon sa maong sportsfest. “Nandito ako nagbibigay lang ng guidance sa kanila,” matod pa niya.

Sa dili pa ang Pebrero 12, ihatag na ni Abarintos ang kumpletong schedule sa ilang sportsfest lakip na ang mga ngalan sa commitee chairman.

Adunay 13 ka teams ang mosalmot sa basketball apan wala pa mahibaw-i kung pila ka teams ang mosalmot sa laing events. Isip defending champion, mosalida dayon ang Hotmen ug bunotan pa kung kinsay ilang kontrahon.

Ang Customs commissioner nga si Napoleon Morales mismo maoy mobukas sa sportsfest diin siya maoy gidapit nga guest speaker.

* * *

Dul-an na sa walo ka tuig nga wala ako maka-uli didto sa among lungsod sa Poro, isla sa Camotes tungod sa atong trabaho dinhi sa Sugbo. Mo-uli unta ako kaniadotng 2008 apan wala kami madayon sa akong ig-agaw nga balikbayan gikan sa Redmond, Washington nga si Prescilla Pono kay naguba ang fastcraft nga amo untang sakyan ug mahadlok siya mosakay og pumpboat maong wala kami modayon og uli.

Kaniadtong Enero 27-30 nakabakasyon ako tungod kay mitambong ako sa lubong sa akong iyaan nga si Servillana Loon kinsa namatay sa edad nga 92 anyos.

Nakurat ako sa akong pag-uli tungod kay akong nakita nga daku na kaayo’g kalamboan ang Poro ug halos tibuok isla sa Camotes lakip ang San Francisco ug Tudela nga silingan ra sa Poro. Ang Pilar nahibuwag nga isla sa Camotes.

May katarungan gyud diay nga ilakip ni Gov. Gwen Garcia ang Camotes sa iyang programang Suroy Suroy sa Sugbo diin iyang gi-promote pag-ayo ang natad sa turismo.

Apan natibhangan og gamay ang akong pagdayeg kay ang among basketball court

gi-atopan na man lang og asul nga trapal. Dili hinoon ang tibuok gym apan may mga lima ka metros sa wala nga bahin ug laing lima ka metros sa tuong bahin isip temporaryong atop sa sin nga gikaon sa taya. Atong pangutan-on si Mayor Gary Rama kung wala ba diay pundo alang sa pag-atop nianang gym?

Igo lang ako nangutana Mayor isip taga Poro nga nia nagtrabaho sa Cebu. Dili kini pagpanaway ang akoa kay kining among trabaho sa media wala kini gipili. Modayeg kami sa mga maayong buhat apan mosaway kami sa mga dautang lihok. Tungod kay duol na man ang pinilay, ayoha gyud Mayor ug kampanya aron madugangan ang imong pogi points.

Matod pa ni Rudy Fernandez, trabaho lang, walang personalan.

Miscellaneous. Today is the birthday of my father-in-law Vicente M. Cao. Also belated birthday greetings to some special persons who turned a year older this month including my Boss Sir Dodong Gullas, USC-South Campus principal Sis. Remedios Socorro D. Aunzo, SSpS last February 5 and to His Eminence Ricardo Cardinal Vidal who turned 79 years old last Febraury 6.